No.3221/2021-2022

Aizawl the 1st December, 2021 : Nimin (30.11.2021) khan Mizoram Sawrkarin AMC huamchhunga sa, thlai leh thei man sang lutuk tur khuahkhirhtu tura a din Committee on Fixation of Price of Meat, Vegetables and Fruit chuan Sairang YMA hall-ah bukna (Weighing Scale) hman a pawimawhna Sairang khuaa thlai thartute hnenah zirtirna an pe a.

Thlai thartute zirtirna hun hi Pi Lalsangpuii, Joint Director, Commerce & Industries Department chuan kaihruaiin, Pu Vanlalhruaia, General Secretary, Aizawl City Local Council Association chuan sawihawnna hun hmangin Covid-19 hripui avanga hun rei tak chhung, a bikin Aizawl khawpui chu kharkhip niin Total Lockdown leh Partial Lockdown te puan a ni a. Hemi chhung hian nunphung a khaihlak nasa em em a, eizawnna hna pawh thawh theih a nih loh avangin harsa zawk tan phei chuan a manganthlak hle thu sawiin, mipui phun thawm chuan sorkar beng a thlen thu leh thil man to zel tur leh mipuite phurrit lutuk tur ven nan Deputy Commissioner, Aizawl District kaihhruaina hnuaiah Committee on Fixation of Price of Meat, Vegetable & Fruit a din a. Department hrang hrang mithiamte nen uluk taka zirin thil man an bithliah chho tak thu a sawi a. Mumal taka thil man bithliah tur chuan a tehkhawng mumal tak neih a ngaih thu sawiin Mizoten thlai thenkhat kan zawrh dan thinah a tel te, a chheh te, a fun te leh a no ang zawnga zawrh a lo awm leh a. Heng ang chi zawng zawng pawh hi tehkhawng mumal tak metric system-a a buk a buka kalpui tum a lo ni tak thu a sawi a. Hemi chungchangah hian thlai thartute leh zuartute tawiawmna a ngen bawk.

Committee hian thlai leh sa man te a bithliah a, chung thil man bithliahte chu zawm a nih leh nih loh Aizawl khawpui chhungah a endik thin bawk a.

He hunah hian Pu Johny Remngaia, Deputy Controller, Legal Metrology, FCS&CA chuan kalkhawmte zirtirna a pe a. Zawhna leh chhanna hun hlawkthlak tak hman a ni bawk a ni.