No.3220/2021-2022

Aizawl 1st December, 2021 : Vawiin chawhma khan Association for Voluntary Blood Donation (AVBD), Lunglei leh Blood Bank, Civil Hospital,Lunglei tangkawp buatsaihin Krismas Puala Thisen Pek Runpui ‘Give Blood, Save Life’ tih thupui hmanga 1st-31st December, 2021 hun chhunga neih tur chu Blood Bank, Civil Hospital, Lunglei ah hawnna neih a ni. Hawnna inkhawm neih hnu hian Lunglei khawpui chhunga college zirlaiten Blood Bank ah hian a thlawnin thisen an pe nghal a ni.

Hawnna inkhawm Pu R. Lalrochama, Finance Secretary, AVBD Lunglei kaihhruaiah Dr K. Lalhmachhuana chuan hawnna thu sawiin medical field ah hmasawnna hrang hrang leh hmanraw tha tak tak hmuhchhuah zel ni mah se thisen tluka nunna chhanna atana tangkai hi ala awmlo a ni tiin damlo leh a mamawhtu ten thisen an dawn theih nana Thisen Pek Runpui program buatsaihtu AVBD leh Blood Bank thawktute fakawm a tih thu sawiin petute leh pek tuma inbuatsaihte chungah lawmthu a sawi a. Krismas Puala Thisen Pek Runpui hi Lungleiah chauh nilovin Mizoram hmun hrang hrangah hman mek a nih thu a sawi bawk.

Lunglei Civil Hospital Blood Bank chu kum 1993 atanga tanin khaihlak lovin a la kal zel a ni. AVBD Lunglei hi 19th October, 2001 din a ni a, Lunglei ah Blood Bank pahnih Civil Hospital leh Christian Hospital Serkawn ah awmin zirlai, YMA leh pawl hrang hrang thahnemngaihna avangin damlo ten thisen an dawng thin.

Mizoram State Aids Control Society, Blood Transfusion Service Division in Half Year Blood Donation Report a tih chhuah ah APRIL – SEPTEMBER 2021 chhungin Mizoram pumah thisen 11,770 unit lak khawm niin heng zinga 10,288 unit (87.41%) te chu a thlawn (voluntary) a pek a ni. APRIL – SEPTEMBER 2021 hun chhung hian Civil Hospital, Lunglei Blood Bank ah thisen unit 907 lak khawm atangin 898 unit (99%) chu voluntary a ni. Hemi hun chhung vek hian Christian Hospital Serkawn Blood Bank ah thisen unit 491 lutin 481 unit (97.96%) te chu voluntary a ni.

Nunna chhanhimtu leh midangte tana malsawmna ni turin, hemi hun chhung hian a thei apiangten thisen pe theuh turin AVBD, Lunglei chuan a sawm a ni. Krismas Puala Thisen Pek Runpui hi 1st-31st December, 2021 hun chhunga hman tur niin thisen pe duh apiang chuan Blood Bank, Civil Hospital, Lunglei-ah Thawhtanni atanga Zirtawpni zing Dar 10 atanga tlai dar 3 chhungin pek theih a ni e.