No.6722/2020-2021

Vawiin khan Mizoram State AIDS Control Society (MSACS) bultumin Multipurpose Hall, Dawrpuiah World AIDS Day hmanna programme buatsaih a ni a, he hun hi Health and Family Welfare Minister Dr. R. Lalthangliana’n a hmanpui a ni.

Health Minister chuan AIDS dona kawnga hmalakna thupui thar "Painting the Town red Campaign" hawnginfuihna thuchah sawiin AIDS do turin mi zawng zawng kan tanrual a tul takzet a ni, a ti a. He hri hi khawvelin a vei a, a manganpui tak tak tih sawiin, a dona kawngah pawh theihtawp a chhuah a, inpumkhatna leh thawhhona tha a tul zia a hriat avangin kumin World AIDS Day thupui atan pawh "Global Solidarity, Shared Responsibility" an hmang hial a ni a ti.

Health Minister chuan COVID-19 hmachhawnna kawngah Pathian kaihhruaina kan chang a, mi zawng zawng thinlung leh tih takzetin kan tawngtai a, kohhran, khawtlang leh tlawmngai pawlte bakah sawrkar leh mimal angin kan tang tlang bawk a. Kan dilna te Pathianin min ngaihthlaksakin India ramah a titha ber State ni hiala chhuah kan ni a ti a, AIDS dona kawngah pawh hetiang bawka kan tan tlan a, tih takzeta kan vei chuan nasa takin awmzia a nei ngei dawn a ni, a ti a. A luhchilhtute thahnemngaihna leh veina ang tak tak hi ram hruaitute leh mi zawng zawngin kan  neih ve a tul a ni, a ti.

Minister chuan kumin kumtirah khan AIDS dona kawnga beihpui thlak tyurin ruahmanna siam anih thu leh hma pawh lak tan a nih thu sawiin, COVID-19 hripui a rawn len tak thut avangin tum angin hma lak chhunzawm theih a nih tak rih loh thu a sawi a. Kan hmalam hun thlirin boruakin  a zir veleh heng ruahmanna siam sa tihlawhtling turin thapui nen theihtawp chhuah tum a nih thu a sawi bawk a ni. Mizoram tluka sawrkar leh mipui thawhhona tha awmna hi khawvel hmundangah awm bik a rin loh thu sawiin, COVID-19 hian inpumkhatna tha min siam a, mitinin an mawhphurhna lakah tlanchhe lovin theihtawp an chhuah vek a, AIDS dona kawngah pawh tha tharin, kalphung siam tharin tan kan lak a ngai a, sawrkar laipuiin ruahmanna a siam piah lamah kan tana tha tur ngaihtuah chungin ke kan pen a tul a ni, a ti a. Pathianin nunna min pek hi hman pawlawh tura min pek a ni lo tih hria ila, vanduai vanga hri kai palh awm thin m ahse a tam ber hi chuan an cho chhuah ni ber hian a hriat a, hei vang hian AIDS chungchang hi sawi a rem lohna hmun pawh a awm lova, khawi hmunah pawh inzirtirna kan kalpui a ngai a ni, a ti a. Theihtawp kan chhuah chuan kan hneh thei a, tihtak zetin pathian tanpuina dilin he hri tha lo tak hi i do tlang zel ang u, tiin Zoram mipuite a ngen a ni.

Keynote address petu Health & Family Welfare Department Secretary Pu H. Lalengmawia, IAS pawhin kan dinhmun hi kan inhriatchian poh leh thla a muang lo a ni, tiin mihring thiamna leh ruahmanna hmanga kan do bakah tihtakzeta Pathian kan auh a tul a ni, a ti.

National AIDS Control Organisation (NACO) in an zirchiann thar ber India HIV Estimates, 2019 kumina an tihchhuahah India rama kum 15 - 49 inkar (Adult HIV Prevalance) HIV positive percent ah Mizoram pakhatna (2.32%) kan ni a, pahnihna chu Nagaland (1.45%) niin pathumna chu Manipur (1.18%) an ni a. Meghalaya (0.54%), Sikkim (0.07%), Arunachal (0.06%), Assam (0.09%), Tripura (0.10%) an ni. India ram puma HIV positive chawhrual (average) chu 0.22% a ni. 

Kumtin mi 1000 zinga kai thar awm zat (HIV Incidence) ah pawh India ramah Mizoram chu pakhatna niin mi 1000 zelah 1.18 (1.18 per 1000 uninfected population) in an kai a, pahnihna Nagaland chu 0.73 an ni.

Vawiin World AIDS Day hmanna inkhawmah hian AIDS Healthcare Foundation (AHF) hmalakna kaltlangin Aizawl khawpuia Taxi Driver leh Two-wheeler taxi driver ten AIDS dona kawnga an hman tangkai tur hmanrua sem a ni bawk.

Vawiin World AIDS Day hmanna ah hian sawrkar thupek angin mi 35 tling lo an kalkhawm a, thutna pawh social distancing vawng turin uluk taka rem a ni.