No.3906/2021-2022
Aizawl, the 4th February 2022 : Vawiin khan Health Minister Dr R.Lalthangliana chuan Zemabawk Cancer Hospital-ah World Cancer Day programme hmanpuiin Mizoram State Cancer Institute (MSCI) building thar a hawng. He programme-ah hian Health & Family Welfare Board Vice Chairman Dr ZR Thiamsanga chu khual zahawm a ni a, Aizawl Mayor Pu Lalrinenga Sailo leh Deputy Mayor Pu R.Thanglura te pawhin he hun hi an hmanpui a ni.

Dr R.Lalthangliana chuan Mizoram State-in ziak leh chhiar thiam tam kawngah leh kawng hrang hrangah chanchin ngaihnawm tak tak a neih thin laiin cancer vei kan tam lutuk erawh a pawi hle, a ti a, National Cancer Registry Programme in report a tihchhuah thinah Mizoramah hian kum tin cancer vei thar 1600 vel hmuhchhuah thin a ni, a ti. Cancer veite enkawlna tur hmun tha tak hawn a ni ta chu Mizoram tan ni chhinchhiah tlak a ni, Health Minister chuan a ti a. Hei aia lian leh changtlung zawk, cheng vaibelchhe 500 senna tur Cancer Superspeciality Hospital pawh din tum a nih dan sawiin he hna hi bultan thuai a nih theih nan Sawrkar Laipui hnuaia Ministry hrang hrangah Technical Committee khirkhan tak tak a paltlang fel tawh a ni, a ti. Dr R.Lalthangliana chuan COVID hripui leng karah Health Department hmasawnna hrang hrang a sawi lang a, hmasawnna ruhrel din kawngah leh bungraw tha lei kawngah hmasawn viau mahse thawktu tha, mithiam, superspecialist, clinical leh academic-a thiamna sang filawr tak tak nei kan mamawh hle tih sawiin Mizo thalaite tan la leh zual turin a fuih a ni.

Dr ZR Thiamsanga chuan Mizoramin Cancer Hospital changtlung tak a nei hi a bik takin cancer vei, sum lama harsa tak tak te tan a hlu lehzual dawn a ni, a ti a. Phaia kal ngai lovin Mizoram chhung ngeiah inenkawlna tha kan nei chho zel hi sawrkar thuneitute leh thawktute inpekna rah a ni, a ti. Cancer hi a hming ringawt pawh a tihbaiawm a, chuvangin a enkawlnaa thawktute an pawimawh a, an tawngkam ringawt hian thinlung damna a thlen a, hmangaih taka an enkawl hian damlote taksa leh thlarau damna a thlen thei a ni tih hre thar leh turin a chah a. Cancer hi enkawl dam theih a ni tih leh cancer thenkhat lakah inven theih a nih dan inhrilhhriat kawngah tanlak lehzual pawimawh a tih thu Dr ZR Thiamsanga chuan a sawi a ni.

Mizoram State Cancer Institute bul tan leh than chhoh dan tlangpui chu hetiang hi a ni:-

1998: February thlaah Aizawl Civil Hospital-ah Unit hran neiin chemotherapy khum pakhat atanga tan a ni a. Hemi kum vek February 4 ah khatih laia Union Minister of State Dr C Silvera hmalaknain Cobalt Therapy, Zemabawk a mi chu hawn niin radiation chu Zemabawk lamah kalpui tan a ni.

2010: August 19 ah Zemabawkah Chemotherapy lakna tur building sak chu hawn a ni. September thlaah Aizawl Civil Hospital atanga insawn pheiin Day Care Chemotherapy khum 5 awma tan a ni.

2012: May 10 ah Indoor Ward khum 10 leh Day Care Chemotherapy khum 10 awm belh lehin chhunzawm a ni. Khum 50 awm theihna turin November 15 ah TB Hospital Building awmna thinah sawn phei a ni a. Radiation building-ah Day Care Chemotherapy khum 15 a awm bawk

2011: August 23 ah Mizoram State Cancer Institute tia hming vuah a ni.

Vawiina hawn tak Mizoram State Cancer Institute (Cancer Hospital) building thar hi Tertiary Care Cancer Centre project niin sawrkar laipui National Programme for Prevention and Control of Cancer, Diabetes, Cardiovascular Diseases and Stroke programme hnuaia awm a ni a. A building bik hi September ni 18, 2020 khan CB Engineers ten an sa tan a. Ward pahnih awmin ward pakhatah khum 16 ve ve, a vaiin khum 32 a awm a, OPD panga a awm bawk.

MSCI sak a nih theih nan hian kum 2014 ah project thehluh a ni a, Central Inspection team te chuan March, 2014 ah a hmunhma rawn tlawhin December 2015 khan cheng vaibelchhe 44.27 chu sawrkar laipui chuan a pawmpui ta a ni. Hetah hian building sakna tur leh hmanraw chi hrang hrang leina tur a tel a. Cancer Hospital building sakna tur atan hian cheng vaibelchhe 8.8 ruahman a ni a, bungraw mamawh chi hrang hrang 25 lei niin heng zinga 23 te hian Mizoram a thleng fel tawh a, a tam zawk hi hman tan a ni tawh a ni. Heng hmanraw pawimawh lei thar zinga langsar tak chu cancer hemna khawl changkang LINAC (linear accelarator) niin hun reiloteah hman tan theih a ni dawn a ni.

Vawiin programme-ah hian World Cancer Day hman ni bawkin kumin atana thupui thlan chhuah chu Close the Care Gap tih a ni a. Radiation Oncologist Dr K. Lalfakzuala’n he thupui sawi zauna hun hi a hmang a ni.

Vawiin programme hi Health Secretary Pu R.Lalramnghakan’n a kaihruai a. Project Coordinator Dr Jeremy L.Pautu chuan technical report a pe a, NHM Mission Director Dr.Eric Zomawia’n lawmthu sawiin hun hnung a khar a ni.