Vawiin chawhma khan World Cancer Day, 2019 pualin Assembly Conference Hall, Treasury Square-ah hun hman a ni. Health & Family Welfare Minister Dr. R.Lalthangliana chu khuallian a ni a, World Cancer Day programme hi National Programme for Prevention & Control of Cancer, Diabetes, Cardiovascular Diseases & Stroke – NPCDCS buatsaih a ni. World Cancer Day, 2019 thupui hi kum thum a tan “Ka ni a, Ka thei a ni” tih thlan a ni.

Health Minister Dr.R.Lalthangliana chuan World Cancer Day hmanna a lokal zawng zawngte hnenah lawmthu a sawi a. Mizote zinga natna lar tak Cancer puala Ni bik, khawvel hmun hrang hranga, an hman ruala Mizoram ah hun hman a nih theih chu lawmawm, a ti a. Cancer laka invenna kawngah te, cancer veite hmuhchhuah hma leh enkawlna ah te, hma sawnna Mizoramin a neih phah ngei a beisei thu a sawi. World Health Organization (WHO) tarlan danin khawvelah kum tin Cancer vei thar maktaduai 18.1 an awm belh ziah a, kumtin maktaduai 9.6 lai cancer avanga tuarna hi a namai lo hle a ni, a ti a. Mizoram pawhin Population Based Cancer Registry te hmalakna a zarah Statistics a nei tawh a, Mizoram ah kum thum chhungin cancer vei thar 4656 zet awmin, kumtin mi 1152 zet cancer vei hmuhchhuah belh zel ang a ni, tiin a sawi a. Minister chuan cancer awmchhan chu hriat vek ni lo mah se, mithiamte’n cancer zawng zawng 30-50% chu nundan (lifestyle) her rem a nih chuan pumpelh theih a ni, tiin an sawi a ni, a ti a. Vaihlo laka fihlim te, zu laka fihlim te, ei leh in hrisel ngaih pawimawh a, exercise lak that leh taksa chet tam te hi a ngai a ni, a ti bawk a. Health Minister Dr. R.Lalthangliana chuan Cancer tam zawk chu hmuhchhuah hma a nih chuan tihdam theih a nih avangin, hmuhchhuah vat a nih theihnan Health Department hmalakna te chu mimal ang te, pawl  ang te, kohhran ang te pawhin ngai pawimawha, tawiawm turin mipui te a ngen a. District tinah Health Department a Chief Medical Officer te, District Hospital hotute, CHC leh PHC a thawktute, leh Sub-centre a thawktute nen inbe rawn a, Cancer Awareness leh Cancer Screening Camp te a tam thei ang bera nei turin a fuih bawk a ni. Minister chuan Mizoram ah Health Scheme ngaih pawimawh a nih tur thu sawiin, thawktu indaihlohna pawh hmalak a ni ang, tiin a sawi a. Health Department hnuaia thawktu awm zawng zawngte chu inpawh tak leh thawhhona tha neih turin leh thurawn pe thin turin a ngen bawk a ni.

He hun hi Director, National Health Mission, Dr. Rozama chuan a kaihruai a. State Nodal Officer, NPCDCS, Dr. Eric Zomawia chuan Cancer leh a vendan chungchang sawiin, Chuap Cancer leh Rilpui Cancer te chu Mizoram ah Cancer thih pui hnem ber an ni, a ti a. Medical Oncologist, Mizoram State Cancer Institute (MSCI), Dr. Jeremy L.Pautu chuan World Cancer Day, 2019  thupui “Ka ni a, Ka thei a ni” awmzia leh tangkaina te a sawi bawk a ni.

Joint Secretary, Hospital & Medical Education, Dr. P.C. Lalramliana chuan he huna lokal  NGO, Health Workers, leh sawm bikte hnenah lawmthu sawiin, hun hi a khar a ni.

World Cancer Day thupui hi Kum 2000 atanga Union for International Cancer Control (UICC) hmalakna in kumtin neih tan a ni.