Vawiin chawhma khan Health Minister Pu Lal Thanzara hovin ‘World Day of the Deaf’ Assembly Annexe Building-ah hman a ni a. He hun hi National Health Mission hnuaia National Programme for Prevention and Control of Deafness (NPPCD) buatsaih niin kumin thupui chu ‘ Full Inclusion with sign language’ (Zaizir nen chuan engkimah kan telve thei) tih a ni.

Khuallian Pu Lal Thanzara chuan bengngawngte chu kan be nawmnah nasain nuihza siam nan kan hmang fo thin a ni tiin hemi avang hian anmahni pawh in kil tawihin, mahni inhmuh hniamna an nei phah a ni, a ti a. Tun dinhmunah pawh hearing aid (Bengri hriatna khawl) kan la pawm thalo hle a ni tiin hearing aid vuahte chu kan endan a dang nghal deuh zel a ni, a ti a. Kan rilru puthmang diklo hi kan thlak a tul hle a ni, a ti. Minister chuan tlawmngai pawl leh mimal thahnem tak bengngawng leh beng thalote tana hmala tute inpekna chu chhuanawm a tih thu sawiin, NPPCD pawh district hrang hranga kalpui a ni chu lawmawm a tih thu a sawi a. Beng thalote chuan endawng an hlawh avangin zaizir an zir tha duhlo fo chu pawi a tih thu sawiin, zaizir hi thil mak en-a en lovin mipuite hian kan pawmthiam a pawimawh thu a sawi a. Hemi atana hmalakna chuan kan thupui “ Full inclusion with sign language” hlenna kawngah pawh thui takin min pui dawn a ni, a ti bawk.

‘World Day of the Deaf’ hi kumtin September thlaSunday hnuhnung bera hman thin niin remchang zawkna avangin Mizoramah chuan vawiin khan hman a ni a. Granville Richard Seymour, Philadelphia, USA a piang, a naupan laia damlohna avanga bengngawng, a chhungten theihtawp chhuaha an enkawlna avanga lemziak leh drama a khawvel pumpuia hming chher ta hriatreng nana hman a ni.

National Programme for Prevention and Control of Deafness (NPPCD) hi India ramah August 2006 atang khan kalpui niin  Mizoramah chuan August 2014 atang khan kalpui a ni a. National Programme for Prevention and Control of Deafness (NPPCD)-in a tumte chu – bengngawng leh bengthalo hmuhchhuah hmaa theihtawp chhuaha enkawl te, tlawmngai pawl hrang hrang leh mimal nena thawhhona tha siam te, hnathawktu training pek that te, ri hriatna thalo chungchanga mipui zirtir leh inhrilhhriatna neih te a ni. 

NPPCD Report & Achievement ( District-7):

He hun hi Hospital & Medical Education (HME) Director Dr. T. Hmangaihi chuan kaihruaiin kalkhawmte lawmna thu a sawi a. National Programme for Prevention and Control of Deafness (NPPCD) State Nodal Officer Dr Eric Zomawia chuan Mizorama NPPCD hmalaknate kimchang taka report pein SCERT Deputy Director, Pi Vanlaldiki Sailo atangin sign language chungchang ngaihthlak a ni a. Health Services Director, Dr. H. Lalchungnunga chuan thusawina hun neiin Gilead Special School leh Deaf School of Mizoram ten special item an nei a. Civil Hospital ENT HOD, Dr. Thanchungnunga chuan lawmthu sawina in programme hi a khar a. Health & Family Welfare Department , SCERT, RIPANS, Gilead Special School, Spastic Society, Deaf School of Mizoram, Central YMA, MHIP, MUP, National Institute of Locomotor Disability (NILD) hotute an tel a ni.