Vawiin khan Health & Family Welfare Minister Pu Lal Thanzara chuan World Leprosy Day puala Synod Conference Centre-a hun buatsaih chu a hmanpui. He hunah hian Sparsh Anti Leprosy Fortnight, National Leprosy Eradication Programme hmalakna hnuaia February ni 1 atanga ni 14, 2017 chhunga neih tur chu Minister hian a hawng nghal bawk.
Minister Pu Lal Thanzara chuan phar natna chu hluar viau tawhlo angin lang thin mah se natna vei hmuh chhuah tur a awm zel thin leh, kum 2015 chhung mai pawha khawvel pumpuiah case thar 2,10,000 awm chuan he natna hi buaipui tham a nih zia a tichiang hle a ni a, a ti a. India ram hi khawvelah phar natna hluarna rama an sawi te zinga langsar ber a nih thu sawiin, thil pawi tak chu heng zinga tam tak te hi enkawlna an dawn har avangin phar natna hian a eichhe hman a, ‘disability’ (piansualna) an neih hman phah thin hi a ni, a ti a. Chung bakah chuan phar natna veite enkawlna chungchang a harsatna lian tak tawh thin chu ‘stigmatisation’ - enhran/thinhrik na awm tlat hi a ni tiin, Health Minister chuan inthliarna avang hian natna veite pawhin mithiamte pan te an hreh phah a, chu chuan awmze neia enkawlna a ti khaihlak tak thin thu a sawi a. Phar natna veite kan endan ah kan insiamthat a pawimawh em em a ni, a ti a. Tiang taka a veite an natna piah lamah, anmahni leh anmahni an in enkawl na kawnga kan tanpui a, Kohhran, khawtlang leh sawrkar kan tanrual a, kan tan mar pat chuan, Mizoram leh khawvel zau zawkah phar natna tello hian kan awm thei ang tih hre rengin, keimahni zawn theuhah hma i la thar leh theuh ang u., tiin Minister Pu Lal Thanzara chuan kalkhawmte chu a sawm a ni.
Vawiin hun hi Dr. K. Ropari, Principal Director, H&FW Department chuan kaihruaiin, Dr. Chawngthanchhunga, State Leprosy Officer hnen atangin National Leprosy Eradication Programme hmalakna ngaihthlak a ni a. Dr. Lalthlengliani, Dermatologist, Aizawl Civil Hospital phar natna chungchang chipchiar takin a sawifiah a, Dr. K. Lalbiakzuala, Mission Director, National Health Mission chuan lawmthu sawiin hun a khar a ni. Vawiin programme ah hian Health Workers’ Training Institute-a zirlai leh zirtirtute an tel bawk a ni.
National Leprosy Control Programme hi kum 1955 khan India sorkar chuan kalpuiin, kum 1983 khan Mizoramah chuan kalpui tan a ni a, January, 2017 thleng khan Mizoramah phar natna vei hriat zat hi 1515 niin, enkawl dam zat mi 1490 an awm a, vawiin thleng hian enkawl lai mi 25 an awm bawk. April ni 1, 2016 atanga January, 2017 chhung khan India ramah phar natna vei mi 888,33 an awm a. Khawvel pum huapa case 53% chu India ram ami an ni. Mi tam zawkin phar natna an hriatthiam theih nan khawvel pum huap Pharte Ni hi Mahatma Gandhi thih champha ah hman thin a ni a. India ramah chuan kumin World Leprosy day-ah hian phar natna awm tawh lohna tura India ram siam tura mitin intiamna chu thupui atan thlan a ni.
