1793/2025-2026

Aizawl the 22nd August, 2025 : Vawiin khan Health Minister Pi Lalrinpuii chuan Zoram Medical College & Hospital-in NQAS Certified Hospital an nih lawmna inkhawm a hmanpui a, hemi rual hian MUHCS hnuaia thuam thar, Private Cabin leh ICU khum dah belh te hawnna a nei bawk.

He lawmna inkhawmah hian Pi Baryl Vanneihsangi Tlau, Bialtu MLA chu Khual Zahawm niin, a telpui bawk a ni.

Lawmna inkhawm hi ZMC&H Director Dr. John Zohmingthanga chuan kaihruaiin inlawmna thu a sawi.

India ram Damdawiin tha (Quality) bik, tehfung hautak tak tak leh endikna point chi hrang hrang points 5000 chuang hmanga, a endiktu mi thiam bik te'na an endik thin National Quality Assurance Standards (NQAS) Assessment chu ZMC&H chuan kumin March thla khan an hmachhawn a, mark 92.89% lai hmuin NQAS Certified Hospital-ah puan an ni.

A hospital pum anga he lawmman hi dawng an nih bakah Nau neihna lama hospital tha bik (LAQSHYA) Certificate pawh dawngin, Nau neihna Ward Labor Room chuan 92.88% a hmu a, nau neih zaina room, Maternity OT chuan 98.26% a hmu bawk. Naupang leh naute enkawlna kawngah Damdawiin tha bik tehna (MUSQAN) Certificate pawh dawngin 92.80% a hmu bawk a. Heti hian ZMC&H chu endikna result-a a sang ber PLATINUM category ah a tling vek a ni.

Vawiina MUCHS hnuaia Minister in ZMC&H-a a hawn tharte hi Private Cabin 30 niin, a hmaa awmsa Room 10 nen, tunah hian Private Cabin 40 ZMC&H-ah hian a awm ta a ni.

ICU khum 13 dah thar chu a hawng tel bawk a, heng bakah hian ward hrang hrangah khum engemaw zat dah belh ani bawk.

Vawiina NQAS lawmna Inkhawm ah hian Health Minister Pi Lalrinpuii chuan Mizoram Sorkar hnuaia Mizoram Health System Strengthening Project (MHSSP) leh World Bank tangkawp hmalakna chungchang sawiin, hemi project hnuaia hlawm lian tak Pakhat, Internal Performance Agreement (IPA) hi sawrkar damdawiin te’n kum 5 chhungin kum 1-ah vawi 4, an thawh that dan azira pawisa an dawn thin a ni a. Hemi pawisa hmang hian sawrkar damdawiin ten quality lamah hmalakna hrang hrang an kal pui a, NQAS certification an neih theih nan IPA ngawrh taka kalpui ani a ti.

“National Quality Assessment Standards (NQAS), Ministry of Health and Family Welfare, India hnuaia MHSSP hmalaknaa Mizoram Damdawiin hrang hrang 42 lai mai in National Certification in lo dawng thei ta leh, chung zinga ZMC&H in a sang ber Platinum Category ah in han certify tel thei hi a ropui ka ti tak zet zet a ni" a ti.

A thusawi zelna ah chuan "Endikna hautak leh duhtui em em, hmanrua leh thawktu duh hnem leh duhtui em em karah, tling nimai lovin, a tehna-a a sang berah in han in hlang thei hi a lawmawm zual hle a ni "a ti bawk.

"NQAS leh IPA assessment hrang hrang atana Hospital Doctor, Nurse leh Staff dangte in thawk rim in, damlo enkawl piah lamah a ziah a ziah fel ngai chi, hna hautak tak tak, zan rei pawh sawi lova in lo bawhzuina te, pawisa funding bei tham tak karah hmanraw tha te leiin, damlo te hnenah service tha thei ang ber neih tuma in rilru leh tha in senna te hi a hlu in, Mizoram mipui tam takin an lo dam pui in an dampui zel ka beisei tlat a ni," a ti bawk. "Hemi certification atan hian, IPA fund chauh hian a daih vek lo tih Sawrkar chuan a hriat pui che u a, Hospital fund awm ang ang te, Hospital head leh Secretary te nena in lo tanrualna leh thawhhona rah hi hmuh a nuam in, entawn tlak ka ti tak zet a ni," a ti bawk.

Pi Lalrinpuii chuan sawi zelin Sawrkar hma laknaah MUHCS tan chhoh anih atangin ZMC&H chu damlo tam ber lo dawngsawngtu an nih angin leh Sawrkar hmalakna tih puitlin a nih theihna kawng sul sutu pawimawh tak te zinga mi an nih avangin mimal tak pawha a lawm thu a sawi bawk. ZMC&H-a Private Cabin, Ward leh ICU khum te, Department thar hawn belh te pawh mipui tan tangkai taka hman a nih zel theih nan te leh, phai lam damdawiin hautak taka pan ngai lova, Quality Treatment an lo pek thin te chu a ropui in MUHCS tihlawhtlingtu ber pakhat anih thu a sawi a, chhawm nung zel turin thawktu zawng zawng te a fuih bawk a ni.

He NQAS lawmna inkhawm ah hian Award chi hrang hrang- Director’s Award, Medical Superintendent's Award, Nursing Superentindent’s Award te sem niin, ZMC&H- a NQAS department ti tha zual 8, Labour Room, Maternity OT(Nau neih zai na), Paediatric OPD, Paediatric Ward, SNCU( Nausen ICU), Blood Bank, Casualty leh General Administration te hnenah hlan an ni. Tin, heng bakah hian ZMC&H department thenkhat in lawmman hrang hrang an dawn te lawmpuina leh award hlanna hun hman a ni bawk.

Inkhawmah hian Dr. Evelyn Lalremsangi Hmar, IPA Secretary & Quality Team Advisor leh Pi Lalbiaknguri, Assistant Director, Directorate of Nursing, Nursing Superintendent kal chhuak ta te'n thu an sawi bawk.

He inkhawm hi Health Department Official hrang hrang te'n an telpui a ni.

Inkhawm hi ZMC&H Medical Superintendent- Prof. Zoramthara Zadeng chuan lawmthu sawina hun hmangin a khar a ni.