1792/2025-2026

Aizawl, 22nd August, 2025 : India rama sawrkar damdawi in ṭha bik tehnaah Mizorama Primary Health Centre pahnih – Lungdai PHC leh Rawpuichhip PHC te an tel thar.

Dr. Lily Chhakchhuak, Mission Director, National Health Mission, Health & Family Welfare Department chuan India rama sawrkar damdawi in ṭha bik tehna, National Quality Assurance Standards (NQAS)-ah Lungdai PHC leh Rawpuichhip PHC chu an tling thar leh tih vawiin khan a sawi a, a tehnaah Lungdai PHC-in 92.92% leh Rawpuichhip PHC-in 84.67% te an hmu a ni. Heti hian Mizoram puma PHC awm zingah NQAS National Certificate hmu hi 31 an awm ta a ni. Rawpuichhip PHC hi Aspirational Block Programme (ABP) hnuaia target zinga mi niin, ABP block pathum (Reiek, Lungsen leh Ngopa) huam chhungah NQAS State Certified hi damdawi in panga (5) awm tawhin he’ng zinga pathum (3) hian NQAS National Certification an hmu tawh a ni.

Heti hian Mizoram chhunga Sawrkar damdawi in 44 te chu NQAS national certificate nei tawh an ni a. Tunah hian sawrkar damdawi in 20-in state level certificate nei mekin national certificate result nghak mek an awm rih lo a ni.

National Quality Assurance Standards (NQAS) certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni. Hetah hian 70% an hmuh chuan certified an ni chauh ṭhin. Heng certified tawh damdawi inah te hian natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te endik an ni.

Health Minister Pi Lalrinpuii chuan heng NQAS certified sawrkar damdawi in kan neih te hi mipuite’n ṭangkai takin hmang se a duh thu a sawi a. Thawktu zawng zawng te chungah lawmthu a sawi bawk.