No.6736/2020-2021

Aizawl, 2nd December, 2020 (Thawhlehni) : Tukin dar 7:00 am khan Health & Family Welfare Minister Dr. R.Lalthangliana chuan Aizawl Hospital main Building, Blood Bank Building leh Trauma Centre sakna tur te chu a hmunah tlawhin hna thawh tur leh siamthat ngai laite a endik.

Dr.R.Lalthangliana chuan Aizawl Civil Hospital chu Mizorama sawrkar Hospital lian ber a nih a, Mizoram hmun tin atanga damloten an pankhawm thin anih avangin theih ang tawk tawka enkawl uluk leh ngaihven a tul a ni, a ti a. Building pui ber hi kum 30 kal ta hmalama sak a nih avangin a hlui tawh a, damlote tan leh mipui tan pawh a him lovin a hlauhawm tawh hle in a hriat a ni a ti a.  Aizawl khawpui lun lai bera awm a ni a, tun lai design thar ang bera thuam that leh sak that a tul tawh hle a, he lai hmunhma hi a pun belh theih tawh si loh a, a hmunhma awm sa tangkai leh tha thei ang bera hman hi kan tih tur a ni a ti.

Health Minister chuan Trauma Centre sakna tur leh Block-B Blood Bank, lab.PMR pawh tlawhin, Trauma Centre building sakna tur pawisa awm sa a nih avangin a hmanhmawh thei ang bera hmalak a tul tih a sawi a, karleh chhungin he mi chungchangah hian Committee ko nghal turin thuneitute a hrilh a. Aizawl Civil Hospital-a Cabin hlui 12 awm mek chu chei that a tul tih sawiin, sorkar sum leh RKS sum hmang kher lo pawhin Minister, MLA bakah a duh apiangin an chhungte hriatreng nan emaw, anmahni hming chawiin emaw cheng nuai hnih thum sengin thawm that theih a ni, a ti a. A sponsor tute hming emaw, an sponsor chhan emaw tarlan sakin ruahmanna siam a theih dawn thu a sawi a ni.

Health department hotute chuan Hospital Building chu quality control lamin an test tawh thu te,  Hospital luh dawn zarhliap chu Steel Structure-a duan mek a, tih that thuai a nih tur thute Minister hi an lo hrilh a. Trauma Centre sak hna pawh thawn tan mai tuma an intintuah laiin remchang takin Smart City Project hnuaiah khung a ni a , a satu turte nen a drawing thar duan leh thu sawiin, AMC lamah pawh an thehluh tawh thu Minister hi an hrilh a. Cheng vaibelchhe 10 chuang a sak tur trauma Centre hi a hnuaiah parking lot zau tak a awm theih dawn thu leh chhawng 6 vela sanga sak thuai a nih tur thu an sawi a ni. Heng bakah hian a hmuna an en atanga siam that ngai lai leh chei that ngaite an sawiho bawk a ni.

Bialtu AMC Councillor (Ward No-IX) Pi B.Lalawmpuii chuan Aizawl Civil Hospital tan hian cheng nuai hnih dawn man Aqua Water Cooler 4 leh RO Filter 4 a pe a. An fund-te la bei tham hle mah se, a tih theih ang ang Aizawl Civil Hospital tan tih ve a duh thu te, X-ray na hmun hnung lam hlauhawm a ngaimawh thu te, toilet leh zunin tha a duh thu te, Cardiology hnung lam retaining wall-na tur AMC atangin Engineer-te nen ruahmanna an siam mek tawh thu a sawi bawk.

Hospital Medical Supetintendent Dr.Lalhmuchhuaka chuan mamawh hrang hrang an neihte leh Hospital dinhmunte report pein, lawmthu sawiin hun a khar a ni.

Minister hi Dr.ZR.Thiamsanga, MLA, Vice Chairman Health & Family Welfare Board, B.Lalawmpuii bialtu AMC Councillor, Health Secretary,  E-in-C PWD, CE-PWD (Building), Aizawl DC, Director, H &ME, EE PWD (Civil), Director DM & R hotuten an an tawiawm a, Hospital Medical Superintendent leh thawktu dangten Minister leh amah zuitute hi an lo dawngsawng a ni.