Health & Family Welfare Minister Dr. R. Lalthangliana’n tukin dar 7:00 khan Aizawl Civil Hospital a tlawhin Department hrang hrang awmna hmun leh building hrang hrang bakah hmanrua leh khawl chi hrang hrang te a en a, thawktu te nen inkawmhona hun tha tak neiin Civil Hospital tihchangtlunna atana thil pawimawh chi hrang hrangte an sawiho a ni.

Health Minister chuan Civil hospital enkawltu daktawr te hnenah Minister anih hnu ah vawi thum a tlawhna ani tawh a ti a, hun chep tak karah a tlawh thin avangin duh angin a tlawh chipchiar thei thin lova, tun tumah chuan chipchiar taka tlawhna hun tha a nei thei ta chu lawmawm a tih thu a sawi a. Aizawl Civil Hospital chu kum 1894 a din anih thu sawiin ram leh hnam rohlu a tling pha a ni a ti a, hei vang hian hlamchhiah theih a nilo a, a tihchangtlun dan tur ngaihtuah a ngai a, a ngaihtuahtu tur Committee pawh din a tul thu a sawi a ni.

Health Minister chuan daktawr leh nurse ten damdawiin bulhnaia chenna tur Residential Quarters an neilo chu pawi a tih thu a sawi a, damlo emergency a buaipui ngai an awmin hei hian harsatna lian tak a thlen thin a ni a ti a. Post Graduate (DBN) zirlaite hostel building pawh tlawhin a rang thei ang bera thawm that dan ngaihtuah anih tur thu a sawi a ni. Daktawr kan ngah rualin Department thenkhat pawimawh tak tak vil tur Specialist Daktawr  kan neilo thin chuan rualawh a tin a ani a ti a, hetiang zirtur hian ram pawn lama zirna sang zawk pan turin kan in tirhchhuah tam a ngai a, daktawr te pawhin heihi ngaihven tura a duh thu a sawi a ni.

Health Minister hian Cardiology ward a tlawhnaah Cardiac Catheterization Laboratory (CathLab) earthing siamthat ngaih avanga khawl hman theihloh a awm chu amah tawiawmtu P&E Department Engineer te hnenah a rang thei ang bera siamthat sak turin a hrilh a, Oxygen Plant Ventilation siambelh ngai pawh amah tawiawmtu PWD Engineer te hnenah Civil hospital hotute nen lo enzui a a rang thei ang bera siam turin a chah bawk a ni.

Health Minister hian Staff indaihlohna avanga harsatna an tawh te a hmunah a enchiang a, abik takin nurse, technician leh IV-Grade indaihlohna nasa chu a rang thei ang bera chinfel anih tur thu a sawi a. Staff indaihlohna avanga Gaeriatric Ward (tar/upate enkawlna) hawn theih ala nilo pawh chu tihdan kawng dap anih tur thu a sawi a. Hospital building hlui upa tawh tak tak te pawh major repair ngai tak tak an nih thu sawiin a theih ang ang a thawm that anih theihnan hmalak a tum thu a sawi a. Building sak thar la luah loh te pawh ruahmanna fel tak nena luah luh dan ngaihtuah a tul thu sawiin, Civil Hospital Department hrang hrang awmna siam rem leh siksawi dan tur te a en a. Cuivil Hospital tlak lam ram ruak la awm pawh tangkai taka hman dan tur lo ngaihtuah a ruahmanna siam turin Civil Hospital hotute a hrilh a ni.

Hei bakah hian Civil Hospital chu khawl tha zawk nen mumal leh awmze nei taka thawm that zel anih tur thu a sawi a. Rogi Kalyan Samiti (RKS)/ Hospital Management Committee(HMC) kaltlangin Emergency Service atan Ambulance thar lei thuai anih tur thu a sawi bakah Dermatology Ward awmlo pawh a rang lama chinfel dan ngaihtuah anih tur thu a sawi a. Trauma Centre sak tura ruahmanna awm tawh rokhawlhna hrang hrang avanga  bul tan theihloh a la awm chu theihtawp chhuah a hmalak anioh mek thu a sawi bawk.

Civil Hospital hotute pawhin Minister chungah an lawmthu leh an thlamuanpui thu sawiin Emenrgency a koh tur Daktawr leh Nurse te awmna tur Quarters Damdawiin bulhnaiah an neilo chu an harsatna lian ber pakhat anih thu an sawi a ni.

Aizawl Civil Hospital ah hian tun dinhmunah Khum 275 a awm mek a, Clinical Department 15, Superspeciality Department 1, Para-Clinical Department 4 leh support Service hrang hrang te nen hospital hi a kal mek a ni. Post Graduate (DBN) zirna subject Panga (5) a awm a, tunah hian zirlai 27 (mipa 19, hmeichhia 8) an awm mek a, MCI leh Indian Nursing Council te pawmpui Training Institute a ni a, ICMR, Department of Biotechnology, MZU, RIPANS ten en thawk hovin Medical research engemaw zah kalpui mek a ni bawk.

Health Minister hi Dr. ZR Thiamsanga, Vice-Chairman, Health & Family Welfare Board, Pu H. Lalengmawia, Secretary, H&FW, Health Principal Director leh Director te bakah PWD leh P&E Engineer ten an tawiawm a ni.