Vawiin khan Higher & Technical Education Minister Dr. R. Lalthangliana chuan Johnson College in zirlai thar an lawmluhna leh zirlai chhuak tur te thlahna programme ‘Freshers’ Social cum Graduation Programme’, Vanapa Hall an buatsaih chu khuallian niin a hmanpui.

Higher & Technical Education Minister Dr. R. Lalthangliana chuan Mizorama kilkhawr leh thingtlang leh chhungkaw dinhmun pan leh harsa atanga lehkha zir tura khawpui lokal te pawh, an tumruh leh an taimak chuan dinhmun pawimawh tak an chelh theiin an langsar thei a, hlawhtlinna an nei thei bawk a tiin tum nget tak neia mahni inrintawkna nei turin zirlai te a fuih a. Khawvel cho en lova, midang tih thei chu Mizo ten an ti ve ngei thei tura inngaiin khawvel chu chuk en lova, a khamphei zawnga en a, chu chu chona lian taka a nei turin zirlai te a chah.

Johnson College zirtirtute chu tunah an Department tlanglawn paruk neih mek chu duhtawk lovin tunlai khawvel  thiamna hman tangkai theihna leh hna hmuh theihna leh eizawnna neih thei ang chi course leh stream atan ngaihtuahna seng turin a chah a. College tihchangtlun leh tih hmasawn kawngah  Sawrkar chuan a tih thei ang ang a ngaihtuah zel dawn tih a sawi a, Session thara PG Class chu college thenkhata neih theih a beisei thu a sawi bawk.

Minister chuan Johnson College in hma a sawn chak nia a hmuh thusawiin college 28 zinga result nei tha ber 5-na an ni chu a lawmpui thu a sawi a. Mizo Central services a tling an tlem chu a vei thu sawiin hemi kawnga hian tan lak a pawimawhin hnamdangin an theih chu kan thei ve a ni tiin hei hi chonaah kan lak a ngai a ni, a ti a.

He programme ah hian College Principal Prof. K. Vanlalmawia pawhin zirlai fuihin thu sawiin zirlai te tan an lehkha zirna kawnga pui turin a bika mentoring programme an kalpui dante a sawi a. Programme hi chawng thuma neih niin Minister in programme hmasa ber a hmanpui a ni.

Attachment

  • Loading attachment...