Nimin tlai khan Higher & Technical Education Minister Dr. R. Lalthangliana chuan Mizoram University Students' Council ten zirlai thlahna programme 'Parting Social 2019'  MZU Auditorium-ah an buatsaih chu khuallian niin a hmanpui a ni.

Higher & Technical Education Minister Dr. R. Lalthangliana chuan MZU zirlai chhuak tur te kutah, hun lokal zel turah Mizoram hmasawnna tur thui tak a innghat dawn tih sawiin nangmahin hi Mizoram beiseina in ni a, he mawhphurna hlenchhuak turin kawng engkimah in theihtawp chhuah turin ka duh cheu a, abik takin PG in zirlai in zawh hnu ah pawh, tha thlah lova, in zir zelna kawnga leh hnathawhna kawngah a ber ni turin ka duh che a ni, a ti. Zirlai naupangte chu tum, chiang tak neiha, chutah chuan an rilru zawng zawng pe tura fuihin, tumruhna, thawhrimna leh hlawhtlin ngei tumna rilru neih te chu zirlai te tan khawvel an hneh theina kawngah an ralthuam a nih thu a sawi.

Kum zabi 21-na chu chona, inelna leh remchanna zabi anih thusawiin Dr. R. Lalthangliana chuan tunah chuan thiam mai a tawk lova thiamna engemaw bik 'specialization' neih a tul mai bakah mahni thiamna te kawih pen 'diversify' a pawimawh a, hetiang tur hian zirlai te hi in kal zelna turah inbuatsaih turin ka  duh cheu ni, a ti a. Tunlai khawvelah hmasawnna, a thleng chak tih sawiin hmasawnna thenkhatin nghawng tha lo te pawh a nei fo thin tiin chungte lakah inveng thiam turin zirlai te chu a chah a. A sawi zel naah tunlai thalai tam tak ten an nun an hman dan chu a veiawm tiin engmah ti hlei lova tlaivara mobile leh computer an khawiha, khawvar dawna mut a, chhun a thawh te hi thil tha lo tak mai, mahni inthunun thei lohna bakah, mihring a hruai lova tiin zirlai naupangte chu hetianga an hun tha, khawhral lo turin a fuih bawk  a ni.

Mizoram University in hun reilote chhunga kawng hrang hranga hmasawnna leh hlawhtlinna a neih te chu a lawmawm hle tih sawiin Mizoram University chuan hmun danga mithiamte an thawhpui leh an kawng hrang hranga an inthlunzawmna hian zirna tha Mizoram a thlen tir zel a beisei thu a sawi bawk a ni.

MZU Parting Social 2019 programme ah Mizoram University Students' Council te chuan zirlai chhuak turte hnenah ngaihhruina an hlan a, Junior leh Senior atangin infuihna tawnna thu sawi te neih a ni a, Student of the Year te, Class of the Year leh Best Department thlan te hnenah citation hlan a ni bawk.