Vawiin khan Pu Lalchamliana, Minister, Home, Taxation, Disaster Management & Rehabilitation Department chuan Mamit a tlawh.

Minister hian 4th IR Bn Headquarters, Luangpawl, SP Office, Taxation Office, District Jail, DC Office, Fire & Emergency Service Office leh Police Station Mamit tlawhin Department hrang hrang a tlawhna-ah hian Department hotute'n lo dawngsawngin harsatna an lo thlente chu Home minister hian a ngaihthlaksak a ni.

4th IR Bn. Mamit Luangpawl a tlawhna-ah hian Pu Lalthakima Deputy Commandant chuan Home Minister-in an hmunhma a rawn tlawhna-ah lawmthu sawiin, harsatna hrang hrang a lo thlen zingah hian man power-a indaihlohna, Post 890 ah 310 hnawhkhah lohte, Battalion chhung inkalpawhna internal road thawmthat, Battalion hmun hma zim avanga harsatna awm chu an ram hrula mimal ram lei belh dan kawng zawn bakah Vehicle chungchangte Minister hnenah hian a thlen a.  Home Minister hian 4th IR. Bn. Hqrs hmuhpui bakah nupui fanau, chhungkua kalsana, ram leh hnam venghim tura Border Out Post (BOP) pasarih (7) hmun hmate tlawh chhuah hrim hrim chu Mamit tlawh a duh chhan pakhat a nih thu a sawi a. 4th IR Bn. Mamit-te Man Power-a indaihlohna hriatpuiin, he mi tiziaawm tur hian armed, un-armed leh a dangte mi 700 lak belh tura ruahmanna siam niin tun kum kal mekah finance-in a phalsak a beisei thu a sawi a. Ram venhimna hna thawk tura lakte chu zu leh ruihlo dang laka fihlim tura chahin Discipline, Physical fitness -te ngaipawimawh thar deuh deuh a, thawhhona tha tak nena hmalam pan zel turin a chah a ni.

Home Minister chuan Mizoram mi leh sa, kan Bru unaute hruailet hna thawh leh turah Mizote chuan lawm taka lo dawngsawngin rilru zau taka lo lawm turin a chah bawk.

Home Minister hi Dr Lalrozama District Bawrhsap chuan lo dawngsawngin Mamit a rawn tlawhna-ah lawmthu a sawi a, Mamit District chu District dang ang lovin  Aspirational kan nihna ang pawhin harsatna kan ngah bik thu a sawi a, Tripura Transit Camp-a Reang (Bru) Mizoram mi leh sate hruailet hna thawk turin hna tan a ni leh tawh thu sawiin, Mamit khawpuiin harsatna a tawh thin bik Power, Tui, leh kawng chungchangte chu minister hnenah hian a lo thlen a ni.

Home Minister hian Mamit SP Office Complex-ah Mamit DEF-a thawkte hman tur GYM chu hawng nghalin Pu Shashank Jaiswal, SP Mamit chuan an dinhmun, harsatna leh rawtna an neihte Minister hnenah hian a thlen bawk a, Police hnathawkte'n hrisel zawk leh Physical Fitness tha zawk an neih theihna turin Exercise lakna tur GYM chu Sub- Division dangah te pawh hawn ni thei se a duh thu a sawi bawk.

Minister chuan Mamit DEF a thawkte chu SP tha tak kaihruaina hnuaiah an hnate tha taka thawk tura chahin, SP thahnemngaihna a GYM hawn a ni ta chu lawmawm a tih thu a sawi a, chu chuan rahtha tak a chhuah ngei a beisei tlat thu a sawi bawk.

Er H. Lalzirliana, Bialtu MLA pawhin thusawiin Mamit District-in harsatna a neihte a taka hmuhpui tura rawn tlawhtu Home Minister chungah lawmthu sawiin Kawng, Power Supply leh Water Supply a harsatna lian tak an neihte chu hriatsak reng tura a duhthu a sawi bawk a ni.

SP Mamit-in a tarlan danin Mamit DEF hi 27th April, 1998 ah din tan niin Sub Division pathum Mamit, Kawrthah leh W.Phaileng -te an awm a, Police Station 5 a awm mek bawk a ni. Thawktu Sanction Strength 235 -ah Present Strength 162 an awm mek a, hnawhkhah ngai zat hi post 73 a ni.

Taxation Minister hian vawiin vek khan Deputy Commissioner of State Tax Office chu tlawhin thawktute'n an lo dawngsawng a. Taxation Office hian kum 2018-2019 chhungin chhiah chi hrang hrang atangin Rs 1,73,94,370/- lak luh niin tun kum kal mekah hian GST ah Rs 97,61,719/-  leh Professional Tax ah Rs 6,70,880/- avaiin Rs 1,04,32,599/-  lak luh a ni tawh a ni.

Pu Lalchamliana Home Minister hian Ni 23rd September, 2016 a hawn tak Mamit District Jail chu tlawhin, chu hmuna awm mekte chu in hremna hmun ringawt ni lovin, nun insiamthatna hmuna hmang turin a chah a. Chhungkua, khawtlang leh ram tana mi chhenfakawm nih tum tura tan la sauh sauh turin a chah a ni. 

Tun dinhmunah hian tang mipa 85 leh Hmeichhia 13 an awm mek a, Tangte'n an mamawh an thlen Water Cooler chu Mipa tangte hman turin Home Minister hian a ngaihtuahsak dawn a, Hmeichhe ward bika hman tur hi SP Mamit chuan a pe dawn bawk a ni. Home Minister hian Mamit District Jail tan hian Volleyball leh Volleyball net a pe bawk.

Pu Lalchamliana Minister-in Office hrang hrang a tlawhkualna-ah hian Er Lalzirliana, Bialtu MLA 3-Mamit, Vanlalchhuanga Commissioner/Secretary, Finance & Taxation, Lalbiakthanga Khiangte IPS,DIG(NR), Er Eddie C.Zothansanga EE, PHQ,  bakah Officials dangte leh khawtlang hruaitute'n an tawiawm a ni.