No.87/2021-2022
Aizawl, 10th April, 2021 : Health Minister Dr. R. Lalthangliana chuan vawiin khan Mizorama damlo zai thin daktawr inzawmkhawm pawl khawmpui vawi hnihna “2nd Annual Conference of Association of Surgeons of Mizoram (ASM)”, Aijal Club MC Cabe Hall-a neih ah khuallian niin a hmanpui a, Minister hi Pu R. Lalramnghaka, Special secretary, H&FW department in a tawiawm a ni.
He hun hmanpuitu khuallian Dr. R. Lalthangliana chuan surgeon ten pawl an din chu a lawmpui thu sawiin, mipuite hriselna leh enkawl dam kawngah awmze nei tak leh tangkai taka ke pen zel turin duhsakna a hlan a ni.
Pu Thangtea chuan heng harsatna hrang hrang kan tawh mek karah hian damlote tana in pe zo tak leh hmasawn tum tlat daktawr rual intelkhawm an awm chu a thlamuanthlak hle a ni tiin, an thiamna leh finna midangte tan malsawmna leh damna a nih zel theih nan duhsakna a hlan a. Pathianin duhtaka a siam mihringte zingah hriselna kawnga harsatna neite enkawl dam hna thawktu an ni chu an chhuanawmin an mawhphurhna a sang hle a ni tih a sawi a, natna chi hrang hrang bakah damdawi leh khawlte pawh khawvel thang zelah a inthlak ve zel avangin englai pawha mahni inzir chhoh reng a tul tih a sawi a ni. Mizoramah sprecialist daktawr kan tlem chu a manganthlak a ni tih sawiin Minister chuan natna chi hrang hrang zinga specialist daktawr kan neih lohna leh kan neih tlem zualna te hi engtianga inphuhruk tur nge tih ngaihtuah a ngai takzet a, kan daktawr thiam neihsa te pawh heng field ah hian specialist ni tura tan lak a tul a ni, a ti.
Minister chuan COVID-19 chungchang sawilangin hlawhtling taka COVID-19 thawhkhatna kan do hneh chhan chu mi zawng zawng kan tanrual vang a ni, a ti a. A thawhhnihna min rawn run tan mek nia lang hi do hlawhtling leh tur chuan a hma anga kan zavaia thuawihna nena kan tanrual leh a ngai dawn a ni, a ti a. Pathian malsawmna leh venhimna dawng tlak turin theihtawp kan chhuah tlan leh a ngai a, mitinin kan hma zawnah mawhphurhna leh tih tur kan nei vek a ni tih hriain sawrkar thu leh hla ngaichanga, zawm thin turin mipuite a chah a ni.
Association of Surgeons of Mizoram khawmpui vawihnihna hi vawiin nileng hian hman a ni a, chawhma inkhawmah hian Mizorama surgeon hmasa ber, specialist doctor hmasa ber ni bawk Dr. R. Tlangkunga, February ni 4, 2021-a boral ta sunna hun hman a ni a, nilengin daktawr thiam mi chi hrang hrang paper buatsaih an zirho a ni.
Association of Surgeons of Mizoram hi kum 2018 khan din a ni a, tunah hian member 34 awm mekin an zinga 4 hian Mizoram pawnah super speciality/MCh an zir mek a, an pawl hian COVID-19 do nan nikum khan Chief Minister's Relief Fund ah Rs. 1,00,000/- an thawh a, Association of Surgeons of India COVID Fund ah Rs. 30,000/- an thawh bawk a ni.
Attachment
- Loading attachment...
