Nimin tlai khan Health & Family Welfare Minister Pu Dr. R.Lalthangliana chuan  Cancer Hospital, Zemabawk tlawhin, thawktu Doctor leh Nurse ten an dinhmun leh mamawhte an lo thlen a ni. Cancer Hospital-ah hian Doctor 10 leh Nurse 16 te an thawk a ni. Khum 25 riahna leh langa enkawlna tur Khum 25 awmin, a vaiin Khum 50 dah a ni.

Minister hian Cancer neite, Radioactive Source hmanga hemna hmun tlawhin, Day Care Chemotherapy Room te, Brachytherapy Treatment Room (a bik inhemna/localised) te pawh a tlawh  bawk a ni. Heng hmun bakah hian inhemna khawl pui bunna tur (Linear Accelerator Building) sak mek pawh a tlawh bawk a ni. Health Minister chuan damdawi chi hrang hrang leh medical instruments te dahna hmunpui Central Medical Store pawh tlawh telin, Store hi thawktu 139 in an enkawl mek a ni.

Health Minister Pu Dr. R.Lalthangliana chuan RIPANS (Regional Institute of Paramedical and Nursing Sciences) pawh tlawhin, RIPANS Director Dr. Chawngthantluanga chuan a lo lawm a, RIPANS Conference Hall-ah Minister chuan thusawiin, mahni intodelh theihna tur course hrang hrang zirna RIPANS-ah a awm chu lawmawm a ti a, sorkarin a tum ber chu mihring hnathawk theia siam a, eizawnna ngelnghet leh eizawnna chhawpchhuah sak a ni, a ti a. Kawng awlsam ni dawnlo mah se, tumna a awm chuan a sual chuah theih a rin thu a sawi bawk a ni.

RIPANS-ah hian Kum 1996-2018 inkarah zirlai 2642 zir chhuak awmin, tun dinhmunah hian zirlai 680 an awm a ni. Department of Pharmacy chuan Kum 2014 atang khan M.Pharm zirna hawng tanin, kum tin zirlai 10 tan admission pek thin a ni a. State Drugs Testing Laboratory awmin, mid-day meal chaw sem te a tha tawk em tihte test a ni thin a ni. Tun hnaia RIPANS in hma a lakna thar Skill Training Course hnuaiah Kum 2018 kumtir atangin Thla Ruk chhung zir General Duty Assistant (GDS), Kum Khat chhung zir Sanitary Health Inspector leh Nikhat chhung zir First Responder Course (Emergency a lo thleng  mimir hnena training pekna) te kalpui mek niin, Skill Train Course te hi kum tina tih phuisui zel tum a ni. Course thar, MSc (Nursing), MSc OOT (Optometry & Ophthalmic Technology), Bachelor in Physiotherapy, PG Diploma in Dietetics and Nutrition te pawh hawn zel tum a ni.

RIPANS ah hian zirlai 60% chu Aizawl pawn atanga zir niin, state dang atangin zirlai 5 vel an awm bawk a ni.

Health Minister hi MLA Pu Dr.Thiamsanga chuan a tawiawm a ni.