Vawiin khan ni hnih chhung awh tur National Conference on Waste to Energy Conversion (NCWEC-2018) hawnna Hotel Floria-ah neih a ni a. Higher & Technical Education Minister Dr. R. Lalthangliana chu khuallian a ni. National Conference hi Department of Mechanical Engineering, NIT Mizoram leh IIT,Guwahati tangkawp buatsaih a ni.

Khuallian Dr. R. Lalthangliana chuan khawvel thang zelah mihringten changkan lam kan pan rual hian tawmhnawk leh bawlhhlawh a tam telh telh a, heng hi tangkai zawnga hmandan kan ngaihtuah a hun tawh tak zet a ni, a ti a. Ram hrang hrang en chuan bawlhhlawh tam zawng leh ram hmasawnna a inzawm tlat a, ram changkang chuan thing leh mau tichereu lo zawnga hmalakna an kalpui nasa a, bawlhhlawh leh tawmhnawk an nei tlema, an neih chhun ang pawh kawlpetha (power/fuel) lama chantir turin hma an la nasa a ni, a ti a. Ram hnufual deuhah chuan mihring tam lutuk leh thingtlang atanga khawpui pem an thahnem avang te, changkanna um nasat avanga khawl hmunpui din te hian bawlhhlawh tam tak (solid, liquid, gas) a siamchhuah tam phah a ni, a ti a. Heng bawlhhlawhte hi kan ramin a mamawh kawlpetha (power/fuel), thing leh mau tichereu si lo pechhuaktuah kan siam thei a ni, a ti a. Chutiang lam zir hona national conference huaihawt a ni chu lawmawm a tih thu a sawi a. Socio-Economic Development Programme (SEDP) hnuaiah pawh hetiang hawi zawnga kawlpetha siamchhuah hi ngaih pawimawh a ni tiin sawrkar chu helama ke pen tur hian an inhawng zau hle a ni, a ti a. Thangthar zawkte pawh hun lo kal zel turah kan chhehvel ram tichereu leh tibawlhhlawh lo zawnga hmasawnna kan kalpui theih nan ngaihtuahna kan sen a tul a ni, a ti a. Conference hlimawm tak nei turin duhsakna a hlan nghal a ni.

National Conference on Waste to Energy Conversion hi NIT Mizoramin national conference an huaihawt vawikhatna a ni a, KIT-TEQIP-III bultum a ni. KIT-TEQIP-III hi Ministry of Human Resource Development hnuaia zirna tihmasawnna atana programme a ni a. Paper 50 chuang atangin zir hona neih a ni dawn a, thupui thenkhat chu Performance Analysis of Plasma Gastification of Municipal Solid Waste and Scope of its Energy Potential, Energy Scenario of Industries of North-East India-Issues and Prospects, Domestic Waste Disposal and Management in Mizoram, Waste Heat Recovery: A Review, Testing of Solar Lantern Systems: A Case Study, Sustainable Wastewater Treatment using Microbial Fuel Cells tih te an ni.
           
He hunah hian Dr. Pankaj Kalita, IIT Guwahati chuan kalkhawmte lawmna thu a sawi a. Dr. Bachu Deb, HOD, ME, NIT Mizoram chuan thusawina hun a nei a. Prof. Saibal Chateerjee, Dean, NIT Mizoram chuan conference chungchang sawizauna a nei a. Dr. H. Lalhmingsanga, NIT Mizoram (Conference Coordinator) chuan lawmthu sawina in hun a khar a ni. Ram pawn hmun hrang hrang atangin zirlai leh mi thiam engemawzat an kalkhawm a ni.