Vawiin chawhnu khan Kulikawn Health Workers Training School Conference Hall-ah Health & Family Welfare Minister Pu Lal Thanzara’n CD4 Counting Machine pathum mipui hman theih turin a hawng a. He hun hi Mizoram State Aids Control Society (MSACS) buatsaih a ni.

Health Minister Pu Lal Thanzara chuan CD4 Count pawimawhna sawiin  HIV positive-te taksa a natna dotu tam leh tam loh enna a ni a, CD4 Count hi an damdawi eiin hna a thawk tha nge tha lo tehna pakhat a ni bawk a, chumi a zir chuan an damdawi ei lai thlaksak an ngai thin a ni, a ti a. Hemi avang hian HIV positive tawh phawt chuan thla ruk danah CD4 Count an tih tir ngei a ngai a ni, a ti. Health Minister chuan HIV Positive-te CD4 Count tih hmasak ber enin za a sawmsarih (70%) vel chuan CD4 Count hniam an nei a ni tiin hemi awmzia chu tunah HIV positive tih hmuhchhuah ni mahse an kaina a rei tawh a, hei hian HIV test tam a, hmuhchhuah hma a pawimawhna a tilang chiang hle a ni, a ti a. CD4 Counting Machine hi Mizoramah pathum chauh kan nei thin a, Civil Hospital Aizawl, District Hospital Lunglei leh District Hospital Champhaiahte khawl hi dah a ni tiin kan HIV positive ten sum tam tak sengin mahni in leh lo kalsanin heng CD4 Counting Machine awmna hmun hi an pan a ngai thin a ni, a ti a. Heng harsatnate vang hian a hun thlap thlapah CD4 Count hi an nei thei ta lo a ni, a ti.

MSACS hmalaknain tunah hian CD4 Counting machine pathum Kulikawn, Kolasib leh Mamit Hospital-a dah tur kan neih belh thei dawn a ni tiin heng CD4 Counting Machine-te hi a man a to bakah National AIDS Control Organization (NACO) ten phalna an pek a ngai a, state dang mihring tam zawk leh indaihlo zawk te pawh pek an nih loh laia Mizoramin pathum kan dawng chu a lawmawm hle a ni, a ti a. Kulikawn Hospital-a CD4 Counting Machine awm tur chuan Aizawl Civil Hospitala hnathawkte a chhawk zangkhai theih dawn bakah Aizawl-ah phei chuan hmun hnihah CD4 Count a tih theih tawh dawn a ni, a ti a. Heng khawl tangkai leh man to, a thlawna in test theihna ni bawk hi hmang tangkai ngei a ngaih thu a sawi bawk a ni.

MSACS Project Director Dr. Lalmalsawmi Sailo chuan thu sawiin CD4 Counting machine hi district tina  ART centre-ah dah ngei tura tan lak a ngai a ni, a ti a. District hrang hranga HIV positive ten hmun hla tak tak kal ngai lovin awlsam zawkin CD4 Count an ti thei tawh dawn a ni, a ti a. HIV positive-te taksa fit leh fit loh bakah an dinhmun en chian zawk nana thil tangkai tak a nih a beisei thu a sawi a. HIV/AIDS chungchanga Mizoram dinhmun enin hemi natna a darh zel loh nan mitin kan tan rual a pawimawh thu a sawi bawk a ni.

CD4 Counting machine pathum hi Kulikawn, Kolasib leh Mamit Hospital-ah dah tur niin National AIDS Control Organization (NACO) bultum a ni. CD4 Counting Machine hi HIV positive-te taksa hriselna tehna a ni a. Mizoramah hian HIV positive ART center-a in ziak lut mi 12,000 vel awmin heng atang hian ART damdawi eilai mek mi 6,623 vel an awm a ni.

Programme hi H&FW Principal Director Dr. F. Lallianhlira chuan kaihruaiin kalkhawmte lawmna thu a sawi a. Hawnna programme-ah hian MSACS hotute, Kulikawn Hospital Medical Superintendent Dr. HC Laldina, Aizawl West CMO Dr. R. Lalthanga, Health Worker Training School Principal, zirtirtute leh zirlaite bakah Kulikawn Hospital-a hnathawkte an tel a ni.