2395/2024-2025

Champhai, 5th October 2024: Tukin khan  Health Minister Pi Lalrinpuii chuan Champhai District Hospital, AYUSH Building, GNM Nursing School, Chief Medical Officer (CMO) Office te a tlawh a. A department chan dang Tourism hmalakna kal mek pakhat - Swadesh Darshan 2.0 hnuaia Convention Center sak tumna hmun pawh a tlawh bawk a ni.

Champhai District Hospital-a inkhawm tawi neihah Pi Lalrinpuii chuan Champhai chu khaw pawimawh leh District lian tak anih avangin mimal tak pawha a ngaihpawimawh an nih thu a sawi a. Champhai District Hospital dinhmun dik tak hre chiang tura tlawhna hun remchang a inher chhuak chu lawmawm a tih thu a sawi bawk. Health Minister hian Champhai District Hospital chu damdawiin fai lawmman ‘Kayakalp Award’ pawh lo dawng tawh an nih angin, thawktute chu faina leh damlo enkawl kawnga an hnathawh ṭha te chhunzawm zel turin a chah.

Health Minister chuan Mizoram sawrkarin thawktu indaih lohna phuhru turin theihtawp a chhuah mek tih he hunah hian a tarlang a. Chief Minister Pu Lalduhoma hmalaknain Pediatrics Intensive Care Unit (PICU) a thawk mek Nurse 36 te leh anmahni puitu mi 19 te, September thla a an thawh hun tawp tur te thawk chhunzawm zel tura tih an nih thu te; Health Worker 51, Pharmacist 17, Nurse (Contract) 40 bakah Drugs Inspector  leh Dialysis Technician te la turin phalna an neih tawh thu te; Champhai Damdawiin mamawh Orthopaedic Surgeon pawh NHM hnuaia la turin hma an lak mek thu te a sawi a ni.

Champhai South bialtu MLA Lt. Col. Clement Lalhmingthanga pawhin thu sawiin, Champhai District Hospital chu khawchhak tlangdung mipui ten an pan ber anih avangin tihhmasawn a ṭul hle a ni, a ti a. A changtu Minister ngeiin an mamawh te enfiah tura a rawn tlawh avangin lawmthu a sawi. Champhai District Hospital mamawh pakhat - Trauma Center panna (Ramp) chu a remchan anga ngaihtuah sak a tum thu a sawi bawk.

Health Minister hnenah hian District Hospital, CMO, AYUSH leh Nursing School hotute hian an mamawh hrang hrang an lo thlen a. Health Minister hian a theih ang a hmalak pui a tum thu a hrilh a ni.

Damdawiin a hun a hman zawh hian Tourism Minister Pi Lalrinpuii hian Champhai Vengsang, Agriculture Rest House hmun hlui muala Convention Center sak tumna hmun a tlawh a. Convention Center hi Swadesh Darshan 2.0 hnuaiah sak tum a ni a, chak taka hmalak mek a ni.

Health Minister hi Pu TBC Lalvenchhunga,  Adviser to CM (Planning & Finance); Lt. Col. Lalhmingthanga, Champhai South bialtu MLA; Pi R. Lalrodingi, OSD to CM Health & Family Welfare Principal Director Dr. Vanlalsawma leh Jt Director Dr. Lily Chhakchhuak ten an ṭawiawm a ni.