3222/2023-2024

Aizawl, the 4th January, 2024: Health Minister Pi Lalrinpuii chuan vawiin khan Civil Hospital Aizawl tlawhin thawktute kawmin hmalaknate a enfiah. Minister hi Dr. Lalmalsawmi Sailo, Director, DHME leh Dr. Zoramthanga, Sr. Medical Superintendent, Civil Hospital Aizawl leh Staff te'n an lo dawngsawng a ni.

Health Minister Pi Lalrinpuii chuan Damdawiina thawktute chu mipuite tana thawk an nihnate hre reng tur leh an tana theihtawp chhuah turin a chah a. Hriselna kawnga hmasawnna tur leh tihchangtlun ngaite pawh theihtawp chhuaha bawhzui zel tum a ni, a ti a. Doctor-ten a hnena an thlen harsatna leh Hospital tihchangtlun nana mammawh an neihte chu theihtawp chhuaha lo bawhzui a tum thu a sawi bawk.

Health Minister hian Civil Hospital Complex-a Trauma Centre sak mek chu a hmunah tlawhin a enfiah a, chak zawka hmalak a nih theih nan theihtawp chhuah turin a chah a. Civil Hospital hnuaia Department tin leh Ward hrang hrangte chipchiar takin a fangkual a. Health Minister hi Civil Hospital-a Doctor te'n harsatna an tawh hrang hrang leh hmasawnna tura ruahmanna an neihte lo thlenin an lo hrilhfiah bawk.

Civil Hospital Aizawla internet kaltlanga OPD card lak chhuahna tur siam peihfel tep tawh chungchang pawh he hunah hian sawiho niin, hei hian mipui harsatna a phuhruk ngei beisei a nih thu tarlan a ni a. Civil Hospital Doctor-te'n Kal thlak (Kidney transplant) tura thiamna an neih tawh dan leh Staff, khawl leh khum neih belh hlek chuan Civil Hospital-ah kidney transplant kalpui an inhuam dante pawh tarlan a ni a. He hunah hian Lung lam enkawlna kawnga hmasawnna neih theih dan tur hrang hrangte bakah thingtlang lama Doctor-te tan heart attack chungchanga training tha zawk pek theih dan turte sawiho a ni bawk.