3221/2023-2024

Aizawl, the 4th January, 2024: Vawiin chawhnu dar 2:00 khan UD&PA Minister Pu K. Sapdanga hovin UD&PA Conference Hall, MINECO-ah Champhai Master Plan leh Aizawl Sustainable Urban Transport Project (ASUTP) chungchanga hmalakna leh hmachhawpte sawiho a ni.

UD&PA Minister Pu K. Sapdanga chuan ram hmasawn leh thang zel atana hmathlir pawimawh tak neih a pawimawh thu a sawi a. Champhai Master Plan hnuaia hmalakna leh ruahmanna siamte chu tha a tih thu sawiin, a hma thei ang bera pawma hmalak a nih theih nana tanlak tlan a tul a ni, a ti a. Master Plan hnuaiah Champhai ti Champhai tu Leilet zawl humhalh chung zela hmalak a pawimawh thu tarlangin, felfai taka Ring Road bakah hmasawnna ruhrel dang, nakin zela siam theihna tur ruahmanna tha tak siam fel a ni chu lawmawm a tih thu a sawi bawk a. Aizawl Sustainable Urban Transport Project (ASUTP) hnuaia project hrang hrangte chu chhawrnahawm tak tur a nih thu sawiin, a tul angte zirchianga hmalak theihna tur angte pawh inrawnkhawma sawiho leh tum a nih thu a sawi bawk.

He hunah hian UD&PA Secretary Pu Lalmalsawma Pachuau hnen atangin meeting koh chhante ngaihthlak a ni a. Champhai Master Plan 2041 buatsaih a nih dan kimchang leh ruahmanna siam hrang hrangte Pi R. Lalhmangaihzuali, Asst. Director, Town Planning, UD&PA in a sawifiah a. Pu HVL Zarzoenga, Individual Consultant, Asian Development Bank (ADB) leh Pu Manish Rega, Team Leader, Project Planning, Design and Management Consultant (PPDMC) te'n Aizawl Sustainable Urban Transport Project (ASUTP) kalpui tura pawimawh leh tulte an sawifiah bawk.

ASUTP hi Asian Development Bank (ADB) leh State Sawrkar tangkawp kaltlanga thawh theih niin, Comprehensive Mobility Plan (CMP) hi zawhfel tawh a ni a, project 60 bawr vel tarlan niin, heng zinga kalpui hmasak tul angte leh State-in a tum ve tur leh a kalpui theih dan turte pawh sawiho a ni a. AMC Area 129 Sq. Km a nih laiin ASUTP hnuaia CMP Area chu 288 Sq.Km a ni a, hemi huamchhunga inkalpawhna tha leh awlsam ruahman chu project tum a ni.

Vawiin thutkhawmah hian UD&PA Director Dr. Andrew H. Vanlaldika leh Official dangte an tel a ni.