3220/2023-2024

2024 Pawlkut thla ni 4: Mizoram Legislative Assembly Deputy Speaker, Kolasib Bialtu MLA ni bawk Pu Lalfamkima chuan vawiin chawhnu khan District Hospital Kolasib building sak hna thawh mek chu a tlawh a. Hna thawktute chu hmanraw ṭha chauh hmang tura chahin, mipuite mamawhna a nasat tawh avangin hna chu chak taka thawk turin a hrilh bawk.

Deputy Speaker Pu Lalfamkima hi Kolasib District Bawrhsap Pu John LT Sanga leh official ṭhenkhatte'n an ṭawiawm a. PWD Project Division-II Sr Executive Engineer Er Lalnghinglova bakah, District Hospital Kolasib-a thawktute leh Hospital sak hna thawktu M/S VRC Constructions (I) Pvt. Ltd, New Delhi hotute'n an lo dawngsawng a ni.

Pu Lalfamkima chuan District Hospital building sak mek chu Kolasib District tan thil hlu tak a nih thu a sawi a. Mizoram hmun ṭhenkhata Hospital sakte a sak chhia leh far a tam tih sawiin, building thar sak zung zung a harsat avangin Kolasib District Hospital building chu ṭha taka sak a nih a beisei thu a sawi.

Pu Lalfamkima chuan District Hospital Kolasib building sak nana hmanrua an hman ṭhenkhatah duhthusam lo leh ṭha tawk lo hman a awm nia sawi thawm a awm thu sawiin, PWD hotute chu contractor-te hna thawh enpui a, an hmanraw hmante a ṭha em tih enpui fo turin a chah a. Leirawhchan (brick) chu Mizorama siamte en a, hman tlak a nih chuan phai aṭanga la kher lovin, Mizorama mi ngei lei ṭha a tih thu a sawi.

Deputy Speaker chuan Hospital sak mek chu mipuite'n an mamawhna a san tawh thu a sawi a. Block A sak mek chu a theih anga ranga sa zo va, damlo inthiar luh theihna tura ruahman a ṭul thu a sawi a. Hna thawktute chu chak zawka hna thawk turin a chah a ni.

PWD Project Division-II Sr EE Er Lalnghinglova chuan building sakna hmanrua an hmante chu an enfiah fo thu a sawi a. Ṭha taka vil zui zel an tum thu a sawi.

Khum 100 awm theihna tur Hospital building thar sak hna hi NESIDS hnuaia sum hmuh cheng nuai 1,859.87 hmanga thawh mek a ni a. Block A, B leh C-a ṭhen niin, Block A hi a building an sa zo thawkhat tawh a. Block B hi sak chhoh leh mek niin, Block C erawh chu tuna damlo enkawlna atana hman mek hi ṭhiah hmasak a ngaih avangin bul an la ṭan thei lo thung.

Hospital building tharah hian lirthei hunna tur basement, ground floor bakah chhawng thum a awm dawn a. Mi 13 chuan theihna elevator (lift) dah a ni dawn bawk a ni.