3987/2023-2024

Aizawl, 28.02.2024: Health & Family Welfare Minister Pi Lalrinpuii chuan vawiin chawhma khan Civil Hospital, Aizawl ah hospital tihchangtlunna tur thil pawimawh tak tak - Biometric Attendance, Medical Record Digitalization, CCTV, Hospital Pharmacy, Jan Aushadhi, Hospital Website, Online OPD Registration & UPI Payment, SMS Lab. Report, OPD Ticket Counter leh HIV Viral Load Machine te chu a tlangzarh a ni.

Health Minister chuan natna enkawlna kawnga hmasawnna pawimawh tak tur vawiinah tlangzarh a ni thei chu lawmawm tiin tangkai taka hman a nih hlawm a beisei thu a sawi a. Thawktute chu mipui rawngbawltu an nih hre reng chunga theihtawp chhuah a hna thawk zui zel turin a a chah a. "Mipui min mamawh tute avanga he department a awm hi kan ni a, min dawrtute hi kan tana mi pawimawh te an ni, chuvangin tute pawh i ngaipawimawh ang u" a ti a. Health Department a thawk te chu an pawimawh thu hrilhin, anmahni dawrtute chu engemaw kawng zawng tala hlimna thlentu ni tura a duh thu sawiin, anmahni rawn dawrtu te leh an thawhpui te hnenah hmangaihna lantir thin turin a ni. Fuih ngai an awm chuan infuih thar sauh sauh a, sim tur nei pawh hnunglama in rel zui mai lova, mi dang hma khua ngai chung leh hmangaih chunga hmalam thlir turin a ngen bawk.

Vawiin programme hi H&FW Principal Secretary Pi Esther Lalruatkimi chuan a kaihruai a. Sr. Medical Superintendent Dr. Zoramthanga chuan report a pe a ni.

Report:

1. Biometric Attendance: Biometric attendance hi thla 1 vel trial run neih anih hnuah mumal zawk a hman tan a ni.

2. Digitalization: Hospital damlo zawng zawng te an record kimchang kum 10 chhung dah that anih hnuah kum 10 chin bak chu hal ral zel a ni thin a, heng damlo history record vawn that te hi research tih nan leh thil dang atan mamawhna alo awm tak zel avangin December, 2023 thla atang khan digitalized a ni a, hei hian record tam tak rei tak tak te pawh him takin a vawng tha tawh dawn a ni.

3. CCTV: 32 Cameras, dual monitoring system te hi damlote leh thawktute him zawk nan installed a ni.

4. Hospital Pharmacy: Heihi damlo harsa zawkte tan pawn lama man to tak tak a lei ngai lova hlawkna um lova siam a ni a, a bik takin Dialysis, Cardiology, ICU patient te tana tih deuh bik a ni.

5. Jan Aushadhi: Damdawi man tlawm dawr Hospital Compound chhungah mamawhtute lei theih turin Outsource a ni.

6. Hospital Website: Heihi mipuiin Hospital chungchang chiang zawka an hriat theih nana duan ani a, hetah hian OPD a Doctor thut hun te, Birth & Death Certificate apply theihna turte, Hospital chhunga thil tih theih leh tih theih loh te, Scheme hrang hrang awm te leh thil dang tangkai tak tak dah tura hmalak a ni. Hriselna lam inzirtirna huang telh tur a hmalak tel a ni. Website address hi civilhospitalaizawl.mizoram.gov.in a ni a, mipui tana awmsam zawk nan cha.mizoram.gov.in ti a hming thlak hi dil mek a ni.

7. Online OPD Registration & UPI Payment, SMS Lab. Report: Heihi Lailen Consulting Pvt. Ltd. (app) te nen tangkawpin trial run neih mek a ni. OPD card la tur thui tak tak in tlar ngai tawh lova, mahni a lak mai theih tura pawisa pekna nen siam a ni. Investigation result pawh a theih chin chin SMS hmanga report thawn chhuah theihna tur a ni.

8. OPD ticket counter hi siambelh a ni a, tunah hian OPD Counter 6 a awm ta a ni, Counter ah hian PwD (Vohbik), Nu naupai, Naupang leh kum upa te tan counter hrang siam a ni bawk.

9. HIV Viral Load Machine: HIV natna hrik tam leh tam lo enna a ni. Treatment response leh drug resistant hriat nan te a pawimawh a. Mizoram a awm hmasa ber a ni.