3988/2023-2024

Dated Siaha 28th February 2024: Vawiin chawhma dar 11 khan District Tobacco Control Cell, Siaha bultumin 'Workshop on Tobacco Control for Church Leaders ' chu DMS, Conference Hall, Siahaah neih a ni.

Dr. Lalnunziri, Sr. Chief Medical Officer leh District Nodal Officer ( Tobacco Control) ni bawk chuan Workshop hawnna leh inlawmna thutawi a sawi a. Mizoramah zuk leh hmuam, vaihlo atanga siam ngawlvei an tam hle tiin, Vaihlo lak atanga fihlim a nih theih nan workshop hi buatsaih a ni, a ti. Tun dinhmunah Mizoram chu meizu tam lamah India ramah pahnihna a nih mek thu tarlangin, hei hian hmalak nasat a tul zia a tilang chiang hle a ti a. Vaihlo atanga siam- zuk leh hmuam ngawlvei zingah Cancer- vei an nasa hle tih sawiin, mi tam takin nunna an chan tawh a, a pawi takzet a ni, a ti. Vaihlo ah hian tur hlauhawm tak 'Nicotine' - a awm a, hei hian a ngawlveina a thlen thin avangin, zuk leh hmuam tih loh tawp hi a him ber a, zuk leh hmuam la ti ve lo te tan tih chhinloh hi a him ber a ni, a ti. Zuk leh hmuam tilo tura inzirtirna leh inenkawlna tha tak Mizoramin a mamawh tak zet a, sawrkar hmalakna atang ringawt chuan hmasawn a har tak zet a, mimal, chhungkua, khawtlang leh Kohhran tanho a tul hle a ti.

Dr. Lalnunziri chuan pawnlam mawina leh thianghlimna piah lam ah chhunglam thianghlimna a pawimawh a. A bik takin Kohhrante nen thawhhona tha tak a awm a tul a ti. Mizoramah chuan Kohhran hian khawtlang nunah huhang lian tak a neih avaning Kohhrante hian zuk leh hmuam laka filhim tura inzirtirna tam zawk nei thin se a duh thu a sawi a. Kohhran lamin theihtawp chhuah a zirtirna an kalpui chuan thangthar lo awm leh zel turte hi Vaihlo- zuk leh hmuam laka an fihlim a beisei awm hle a ti . Vaihlo hi ram leh hnam hmelma lianber pakhat a nih avaning theihtawp a do a tul hle a, mitin zuk leh hmuam laka fihlim tura tan lathar turin a chah a, a bik takin Kohhran hruaitute chu Kohhran thiltihna hrang hrangah uar zawk a vaihlo thatlohna sawi a, zirtir thin tur leh an theih chin chinah theihtawp lo chhuah zel turin a sawm nghal a ni.

Vawiin 'Workshop on Tobacco Control for Church Leaders ' ah hian Pu R. Lalremruata, State Consultant (NTCP), chuan Zuk leh hmuama Mizoram dinhmun tlangpui tarlanna a nei a. Vaihlo- zuk leh hmuam chi hrang hrang bakah an hnathawh dan tlangpui, taksa a harsatna bakah Cancer hial a thlen theih dante, zuk leh hmuam do na kawnga dan awm leh hman mekte zirtirna a nei a. Zawhna leh chhanna hun hlimawm tak hmang ho a ni bawk.

Dr. S. Vabeilysa, Dy. Chief Medical Officer chuan kalkhawmte hnena lawmthu sawina neiin Workshop hi a khar a ni.