No.3686/2020-2021

Nimin tlai dar 5:00 khan Health Minister Dr. R. Lalthangliana chuan Aizawl Civil Hospital a tlawh a, Minister hi Health & Family Welfare Board Vive-Chairman Dr. ZR Thiamsanga leh Health department hotuten an tawiawm a ni.

Health Minister chuan Civil Hospital-a Medicine ICU khum 10 awmna tur sak mek, Makeshift ICU khum 10 awmna tur sak mek leh Naupang damlo na zual enkawlna tur Pediatric ICU, khum 5 awmna tur sak mekte a tlawh a, heng bakah hian Operation Theatre tlawhin, Civil Hospital building hlui deuh ho dinhmun a enfiah bawk a, Trauma Centre sakna tur hmun a enfiah bawk.

Health Minister chuan COVID-19 hripui leng vanga tum anga thil engmah a kal tluan theihloh thu sawiin, Zoram Medical College (ZMC) chu COVID-19 veite chauh enkawlna tur (Dedicated COVID Hospital) atana puan a nih tak avangin ZMC-a damlo enkawl laite pawh Aizawl Civil Hospital-ah thawn phei an ni a, COVID-19 nilo natna hrang hrang vanga harsatna tawk tam tak an awm bawk nen Aizawl Civil hospital lam pawh an hah hle a, an inpekna pawh a fakawm a ni, a ti a. ICU hrang hrang a en te pawh chu civil works zawh fel thuak a ni tawh a, khawl mamawhte pawh a awm deuh vek tawh a, ICU a thawk tur mi thahnemtak lak an ngai dawn a ICU te hi rang taka hman theih tura buatsaih a tul a ni, a ti a. Aizawl Civil hospital-a thawktu ten an mamawh chi hrang hrang an lo thlente chu a theih ang anga ngaihtuah a nih tur thu a sawi bawk a ni.

Minister tawiawmtu Health & Family Welfare Board Vice-Chairman Dr. ZR Thiamsanga pawhin Aizawl Civil Hospital-a ICU tur khum 20 chuang zet mai peihfel a ni tep tawh chu lawmawm a tih thu sawiin, a bik takin thingtlang lam mi damlo serious tak takte pawhin private hospital pan ngai lovin Aizawl Civil Hospital  ah enkawlna tha tak an dawn theih phah tawh dawn a, amaherawhchu a thawktu tur lak belh a ngaih dawn avangin sawrkar pawhin hei hi ngaih pawimawh hmasakah a neih a tul a ni, a ti bawk.

Attachment

  • Loading attachment...