No.3685/2020-2021

Republic Veng Branch YMA chuan vawiin (August 1, 2020) chawhma khan vengchhung zirlai ti tha chawimawina hun an hmang a, he huna khuallian Pu Robert Romawia Royte, Minister of State, SYS etc chuan thu sawiin hlawhtlinna leh chawmawina hi chapo nan hmang loin inrintawkna neihna tur a ni a, veng khat topper chuan Mizoram chauh ni lovin India ram thlenga lang chhuak thei turin theihna in nei a, a mamawh chu inrintawkna a ni, tiin zirlai kalkhawmte a fuih a ni.

Pu Robert Romawia Royte chuan tun hi  bul tanna chauh a ni a, thawhrimna leh tihhram hramna nen hlawhtlinna in chang ngei ang tih hi ka ring a, ram tana chhawr tlak ni turin lehkha in zir sauh sauh a ngai a ni, a ti a. Khawi zawnah pawh hlawhtlinna a awm a, veng khat topper ni tan IAS te, doctor te, engineer te nih a huphurhawm loh a, vawiina chawimawi te hian in thei a ni tih in inhriat a ngai a ni. Hemi tur hian theihtawp in chhuah a ngai. Hna thawh tur hi a taima tan chuan a harsa lo a, hna hmu tlak tura zir a ngai a, tih takzeta in zir chuan hna hi a la awm a ni tiin zirlaite hmabak a la en thu a sawi.

Covid-19 chungchang sawiin Minister Pu Robert Romawia Royte chuaipui len laia Mizo mipui chet dan hi entawntlakin, ropui a tih thu a sawi a; YMA, Kohhran leh Sorkar thawhhona hi a ropui hle a ni, a ti a.

Covid-19 vangin programme lian tham buatsaih theih a ni lo a, zirlai ti tha bakah khawtlang hruaitu sawm bik mi tlemtein zirlai chawimawina hun hi an hmang. Republic Veng Branch YMA hian veng chhung bika HSLC top 10 bakah HSSLC pass tharah Science leh Arts top 5 bakah Commerce top 3 hnenah citation leh pawisa fai hlan a ni.

Republic Veng hian 2020 HSLC-a pahnihna C. Vanlalruatfeli an kawl a, Class X-ah Republic Veng pakhatna a ni. HSSLC (Arts)-a Mizoram puma pakuana Malsawmdawngzela an nei a, chutih rualin Arts bika Republic Veng pakhatna erawh Shillong lama zir C. Ramtharmawii a ni a, Science-ah pakhatna pahnih awmin B. Vanlalzuii leh Zodingpuii Hmar te an ni a, Commerce-ah Lalrinnungi chu pakhatna a ni.