No.2562/2021-2022 

Aizawl, 11^th October, 2021 : Health Minister Dr. R. Lalthangliana chuan vawiin khan Dedicated COVID Hospital, Zoram medical College (DCH-ZMC)-ah Intensive Care Unit (ICU) ward thar, khum 10 awmna a hawng.

Lecture Theatre-I, ZMC-a ICU ward thar hawn puala inkhawm buatsaihah Khuallian Dr. R. Lalthangliana chuan COVID-19 jripui thawhkhatna ‘first wave’ ah khan Pathian venhimna leh kan tanrualna azarah kan tuar na lova, tunah erawh kan dihnhmun sawi ngai lovin kan hre vek a, first wave laia kan fimkhur ang khan mimal tinin mahni hmun theuhah tan kan lak thar theuh a tul hle a ni, a ti a.

COVID-19 first wave ah khan ICU khum 12 neiin second wave atana theihtawpa kan inpuahchahna ah khum 21 siam belhin khum 34 kan nei ta a, amaherawhchu kan dinhmun heti a nih takah hian ICU khum kan indaih lova, nitin nunna chan leh damlo serious an pun tak zel avangin hmanhmawh takin ICU khum 10 dah belh turin tan kan la a, emergency meeting te neiin a thawk tur nurse 50 lak belh kan rawt a, meeting zawh tukah  advertisement kan tichhuak nghal a, rei pawh rial thei lovin interview kan ti nghal rum rum lo thei lo a, indo laia sipai lak tul ang deuh kha kan dinhmun a nih avangin formality pawh kan zawm hman lova, ICU peihfel ruala nurse te luh tir a ngaih tawh avangin written exam tihna hman pawh a awm lo a ni,a  ti a. Interview Board 5 siamin Board tinah hian DP&AR, Nursing Council leh Doctor aiawh mi 1 theuh an awm a, ni 4 chhung interview hi neih a ni,a ti a. tihsual palh a lo awm palh a nih pawhin rikrum thil tak meuh meuh a lak an ni tih min hriatsak ula, tihsual palhah min hriatthiam kan dil tak meuh a ni, a ti.

Minister chuan ICU-a thawk tur specialist daktawr pawh 3 sawrkarin lak min phalsak leh a, ICU a duty daktawrte an lom positive ve chang a awm hian a thlakna turah kan mangang thin khawp a, tunah chuan kan zia deuh a beiseiawm, a ti a. Finance Department changtu kan Chief Minister zahawm takin hriattghiamna thui thak nen kawng hrangb hrangin ruahmanna min siam sak thin a, a chungah Health department changtu Minister ka nihna ang pawhin lawmthu ka sawi a ni, a ti a. ICU ward thar khum 5 – 10 inkar awm theihna tur pawh ruahman mek a nih thu sawiin, reilote ah kan hman theih kan beisei am ti bawk.

Minister chuan ICU atana thilpek petute chungah lawmthu sawiin LG Company-in A/C leh Fan thahnem tak min pe a, hun hmasa lamah oxygen indaihlohna nasa tak kan neih avangin thla 2 chhung chu FK Oxygen Plant ten min awi a, anni bakah hian ZMC leh hripui dona kawnga thilpek chhiarsen loh min petute zawng zawng chungah lawmthu ka sawi a ni, a ti.

Minister chuan midangte lainatna leh hmangaihna nena enkawltu nih tluka hlu hi a awm lova, hetiang hna ropui thawktute hi in chhuanawm takzet a ni, a ti a. ICU thar kan nei hi a lawmawm rualin tumah lut tur awm lo se tih hi ka duthusam a ni a, mahse tulna thil avangin a dawhthleng kan lo buatsaih hi a ngai si a, he ICU ward hi damloten damna hmun atan hmang ngei se a duh thu a sawi a ni.

Bialtu MLA Prof F. Lalnunmawia pawhin thu sawiin ZMC hi ka bial chhunga awm ni mahse, Zoram pumin kan chhawr a, COVID hrupui leng karah kan hmang tangkai hle a. ICU kan mamawhna hetiang zat kan hawng thar thei hi ka lawm takzet a ni, a ti a. Tun dinhmun kan thlen chhoh theihna chhan hi kan CM leh Health Minister te thahnemngaih vang a ni a, thawktu zawng zawngte nen kan thawhhona that avangin lawmthu ka sawi bawk a ni a ti. Tuna ICU kan hawn thar hian kan harsatna engemaw chen chu min phuhruk ka beisei a. Mizoram bik hi COVID vaccine lakah kan ti tha a, tan la zual zel i la, nunna tam tak kan in chhan theiin ka ring a ni, a ti.

ZMC-a ICU Ward thar hawn hi tuna ICU leh SICU ward hman lai mek chungah a awm a, ICU khum pakhat hian 250 sq. feet a awh a, LG Company in an pek A/C dah vek niin, donning/doffing area a awm bawk a, ICU khum tinah hian air mattress dah vek niin, Oxygen Plant atangin oxygen pipeline thlunzawm veka  ni bawk. Japan sawrkarin Ministry of Health & Family Welfare kaltlanga a rawn pek Phillips ventilator tha chi viuah vek ni bawkin, Cardiac Monitor dah vek a ni a, infusion/syringe pump 30 awmin, suction machine vuah vek a ni bawk a, heng bakah hmanraw dang neuh neuhte nen ICU khum pakhat hian Rs. Nuai 5 vel hu a keng tel theuh a ni. ICU buatsaih nan hian Mizoram sawrkar chuan cheng nuai 39 a seng bawk a ni.

Vawiin ICU hawnna ah hian Falkawn khawtlang hruaitute, Aizawl City Local council Association hotute, Heath Department hotute leh sawm bik mi pawimawhte an tel a ni.

Vawiina ICU hawnna in khawm hi Health Secretary Pu R. Lalramnghaka'n a kaihruai a, Dr. Lalnunmawii Sailo, HoD & Associate Professor, Anesthesiology, ZMC hnen atangin technical report ngaihthlak a ni a, ZMC Director Dr. John Zohmuingthanga’n lawmthu sawina in hnu a khar a ni.