No.2563/2021-2022 

Aizawl, 11th October, 2021 : Ni 10 chhung awh tur (October ni 11 - 20, 2021) Mizoram puma hmai tuamna vuah tura beihpuithlakna  'All Mask Campaign' chu Health Minister Dr R. Lalthangliana'n vawiin khan a hawng. 

Mask vuah campaign hawnna ZMC Central Library a buatsaihah Health Minister Dr R. Lalthangliana chuan Mizoramah COVID-19 hri kai kan pung chakin nunna chan kan pung chak hle bawk a, India hmarchhak State 7 te active case (positive vek) belhkhawm aiin Mizorama COVID-19 hri kai active case a tam zawk a, kan dinhmun thlira rawtna siam turin Sawrkar chuan State-level Expert Team on COVID-19 Management a din a, annin rawtna hrang hrang an siam zingah mipuite hnena mask vuah uar tura inzirtir a tel a, chumi bawhzui chuan ni 10 chhung uar taka hmalakna kalpui turin chet kan la ta a ni, a ti.

Zirchianna hrang hrangah a lan tawh bakah a takin (practically) mask vuah that hian min lo veng hle a ni tih kan hre tawh a, mask vuah that pawimawhzia hi chu kan hre vek tawhin a rinawm a, kan zawm tha hlei thei lo ni a a lan avangin tuna Campaign kan neih tur hian awmzia a neih ngei ka beisei a ni, a ti a. Kan himna tur, hri kai enkawl ngai nih kan pumpelhna tur pawimawh ber pakhat a ni tih hria ila, hmawikawr atan hian kan remchan dan ang angin hmanrua (rawmawl hlai, scarf etc) kan ban phak maiah kan insiam chawp thei tih i hre bawk ang u, a ti a ni.

Minister chuan ICU leh COVID-19 hri kai enkawlna hmun hrang hrang a khat hneh hle mai a, mimal tin kan fimkhur a ngai a, chhungkuaah kum upa leh natna khirh vei kan nei a nih phei chuan kan fimkhurpui hle a ngai a, an sahimna hi kan mawhphurhna a ni tih kan hriat a ngai a ti a. Hripui leng a reh hma hi chuan a tul tawpah lo chuan inlenpawh lo ila, kan inlenpawh a nih pawhin mask vuah that bakah kut silfai that leh midang hnaihchilh loh hi i zawm hram hram ang u tiin, sawrkar chakna leh sum leh pai hmanga do hneh chi a ni lova, kan zavaiin kan pawimawh theuh tih kan hriat reng a tul a ni, a ti bawk.

State Level Expert Committee on Covid Management  chuan Mizoram pum huap in All Mask Campaign, Hmaituam Beipui- Inchhung leh midang bulah neih hi a rawt a. He Campaign hi October ni 11 – 20, 2021 chhunga neih an rawt a ni.

State Level Expert Committee on Covid Management  in All Mask Campaign (Hmai tuam beihpui) neih an rawt chhan hi an tarlan dan chuan Mizoram ah Covid-19 a pung zel rih a, hei hi a chhan ber chu mipuiten Covid Appropriate Behaviour (CAB) kan zawm that tawk loh vang tih a chiang em em a. A bik takin inchhungah Covid virus hi a darh ber a ni tih hriat a ni a, Inchhung (Indoors) ah ber hian Mask kan vuah tha lo tih alang a ni an ti.

An sawi zel danah Covid Positive te hi a tam ber chu ni 10 chhungin an dam tih hriat ani a. He covid virus kai te an dam theih hun chhung ni 10 tal hian Mizoram chhunga mipui zawng zawng ten Mask vuah/Hmai tuam tha taka kan zawm chuan kan case pung mek leh kan inkai darh nasa lutuk hi nasa takin a tlem a beiseiawm a ni an ti.

Indoor /Inchhunga mask hman hi a tha tih a lan chianna em em chu Covid Positive enkawltute leh Doctor leh Nurse Covid enkawl tute ngei pawh an kai manglo a ni tih a chiang tawh a, hei hi a chhan ber chu Mask an vuah that vang a nih ngei a rinawm a, hei hi Scientific evidence pawh awmin khawvel ram dangah pawh kailo tura invenna pawimawh ber pawla ngaih a ni, an ti.

Campaign neih laia zawm tur a hnuaia tarlan ang hian an ruahman:

1.  ‘All Mask Campaign’ lai hian Mi zawng zawng mahni Inchhungah chawei lai tihloh chuan mask vuah/Hmai tuamna hmang tura ngen leh beisei kan ni.

2.   ‘All Mask Campaign’ lai hian chhungkua pawh chaw kil ho lovin, a hrang (Buffet) a ei tura ngen leh beisei kan ni.

3.  ‘All Mask Campaign’ lai hian hnathawhna hmun, a bikin inchhung (Indoor) ah te Mask tha taka vuah tura ngen leh beisei kan ni. Tin thil ei ho loh tur a ni bawk.

4. ‘All Mask Campaign’ lai hian khawlai ah pawh Mask vuah leh CAB dang zawm tura beisei leh ngen kan ni.

5.  ‘All Mask Campaign’ lai hian Kut Silfai – Tui leh Hand Sanitizer hmangin uar lehzual tura beisei leh ngen kan ni.

Campaign lai hian slogan hrang hrang a hnuaia mi ang hian an siam bawk.

1.  Oxygen mask i vuah loh nan tunah Face mask vuah rawh

2.  I rin aiin face mask hian a chhan ang che

3.  Face Mask hmangin I nunna chhanhim rawh

4.  COVID 19 damlo enlawltu i nih loh chuan eng face mask pawh a tha e.

 All  mask campaign hi Mizoram khaw tinah kalpui tur niin District tina Deputy Commissioner te kaltlangin hmalak a ni ang.

Vawiina All mask Campaign hawnna inkhawm hi Health Secretary Pu R. Lalramnghaka’n a kaihruai a, State Level Expert Committee on Covid Management  Converner Dr. F. Lallianhlira’n keynote address a pe a ni.