No.2564/2021-2022 

Aizawl; the 11th October,2021 -  Vawiin chawhnu khan Chief Medical Office, Lungleiah All Mask Campaign (Hmaituam Beihpui) ni 11th October,2021 atanga 21st October,2021 thleng a State Level Expert Committee on Covid Management-in Mizoram pum a neih tura a rawt chu a hawnna hun hman a ni.

Dr. L.C. Liana, CMO chuan All Mask Campaign hawngin “He campaign kan hman chhung hian mitin in mask vuah that, kut sil that bakah a hu hova awm khawm loh tih te kha zawm thar leh ila, he hri kan in kai darh chak nasa lutuk leh positive case pung mek hi a tla hniam dawn a ni”, a ti. Hnathawhna hmun ngeiah pawh mask vuah tha ang u, tiin kalkhawmte a chah a ni. 

Dr.Lalrinthangi, SMO in report pe in Lunglei district ah CCC leh DCHC 10  a awm a, 4C hi 23 a awm a ni. Second Wave-a Covid19 positivity rate chu 10.99% niin tun dinhmunah Lunglei District-ah mi 21 in Covid-19 avangin nunna an chan tawh a, vaccine 1st dose la tawh mi 93,731 leh 2nd dose la tawh mi 65,671 an awm a ni, a ti.

Vawiin hawnna inkhawm hi Dr.Lalrinthangi, SMO in kaihhruaiin Dr. L.C. Liana, CMO in hun a hmang a ni.