No.2565/2021-2022  

Aizawl the 11th October, 2021 : Vawiin tlai khan Lunglei Deputy Commissioner Pu Kulothungan A kaihhruaiin a office chamber-ah Lunglei District chhunga kawng dinhmun tlangpui leh a chhe lai te siam tha tura hmalak tul leh chet lak dan tur ngaihtuah hovin meeting neih a ni.

He hunah hian Lunglei Additional DC leh Competent Authority for Land Acquisition (CALA), NH-302 ni bawk Pu M. Misael, Settlement Officer Pu Alan Lalthanzara te bakah PWD Road Lunglei Division, NHIDCL leh NH-302 a hnathawktu contractor SRK Construction Projects Pvt Ltd, Hyderabad hotute an tel a ni

Meeting-ah hian Lunglei District huamchhunga World Bank Road (Aizawl-Thenzawl-Lunglei kawng) dinhmun chipchiar taka sawiho niin hmun engemawzata chhe lai, a bik takin Ramlaitui leh Haulawng inkar kawng te thawm that thuai a tul thu sawiho a ni a. PWD Road Lunglei Division hotute tarlan danin helaia hnathawktu Bhavya Constructions te chuan hun rei tak atangin Covid-19 hrileng avanga hnathawk tur mihring an mamawh zat an hmuh theihloh thu leh hemi avang hian ATL Road 110kms – 126kms siam that hna (strengthening and resurfacing) chu la zawh fel theih anih rih loh thu an report a. Fur ruahtui a zia awm hunah hna hi chak zawka thawh theih anih tur thu an sawi bawk a ni.

NH 302 - Lunglei (3-Gate) atanga Tlabung kawng 90.30 kms a thui, a siam that hna SRK Construction Projects Pvt Ltd in an thawh tan mek dinhmun pawh sawiho niin hna chak zawka kalpui anih theihnana hmalak tul te ngaihtuah ho a ni.

Lunglei DC Pu Kulothungan A chuan ram hmasawnna hnuk pawimawh ber chu inkalpawhna a ni tiin, Lunglei District-a kawngte a lo that a a lo changtlun zawk theih nan a mawhphurtu pawimawh kalhawmte chu theihtawp chhuah zel tur leh harsatna an neihte pawh District administration ah thlen vat thin turin a chah a. Kawng chhia avanga eibar leh mamawh dang ah mipuiten harsatna an tawhh loh nan FCS&CA, Revenue Department leh Tlabung Sub Division hotute nen tangrualin buhfai leh mamawh dang phur motor-te ngaihven thin anih thu a sawi a. Sawrkar hotute hnena an ngen angin Lunglei Revenue Department-ah Surveyor panga (5) dah belh lai lawk chu sawrkarin phal sak tawhin an rawn zawm thuai tur thu a tarlang bawk.