3020/2023-2024

Aizawl, the 12th December, 2023: Health & Family Welfare Department changtu Minister Pi Lalrinpuii chuan vawiin khan Health & Family Welfare Department hnuaia Directorate hrang hranga hotute a Office Chamber-ah meeting a neihpui.

Health Minister Pi Lalrinpuii chuan hriselna kawngah Mizoramin hma a sawn theih nan theihtawp chhuah a tum thu sawiin, hmachhawpte tihlawhtling turin Department hnuaia thawkte thahnemngai taka thawhpuiah a sawm a. Health & Family Welfare Department hnuaia thawktu zawng zawngte chu inthlahdah lo tur leh taima taka thawk turin a chah a. Theihtawp chhuaha thawk chhunzawm zel tura a ngen bakah kum nga chhung ngeia Mizoram health care system tidanglam dawrh thei tura thawhpuiah health department official-te a sawm nghal bawk.

He hunah hian Health & Family Welfare Department hnuaia hmalakna leh hmachhawp hrang hrangte powerpoint presentation kaltlanga ngaihthlak a ni a. Dr. Vanlalsawma, Principal Director, H&FW Department, Dr. Lalmalsawmi Sailo, DHME, Pi Lalchhanhimi, Jt. Director, Nursing, Dr. Mara Thansiami, Dy. Director, AYUSH, Dr. Lalremmawii, DHS, Dr. Eric Zomawia, MD, NHM, Dr. John Zohmingthanga, Director, ZMC, Dr. Biakthansangi, CEO, MSHCS, Dr. Jeremy L Pautu, Director, MSCI, Dr. Lalthlengliani, Project Director, MSACS leh Pu Lalsawma Pachuau, Jt. Director, F&D ten powerpoint presentation hmangin hmalaknate an sawifiah a ni.