Vawiin chawhnu dar 2 khan Health & Family Welfare Minister Pu Lal Thanzara chuan Digital X-Ray Machine, Project Nauban kaltlanga dawn chu Central Jail-ah a hawng.
Health Minister chuan TB natna veite zawn chhuahna tura Central Jail-a Digital X-ray khawl bun ani chu lawmawm a tih thu a sawi a. Mizoram chu HIV/AIDS vei tam lamah India rama pahnihna a nih avang leh HIV+ tam zawk chu TB vei ngei tura ngaih an nih angin Mizoramah pawh hian TB vei an tam ngei a rinawm a ti a. Heng natna enkawl buaithlak tak hi Jail-ah te inkaidarh a awl bik thu sawiin hemi chungchanga Project Nauban hmalakna leh Central TB Division hnen atanga khawl tha tak an dawng chu lawmawm a tih thu Minister chuan a sawi bawk.
Pu Lal Thanzara chuan India ram Jail –a HIV-TB research hmasa ber tur Mizoram Central Jail-a tan ani chu lawmawm a tih thu sawiin Project Nauban hmalakna chu a hlawhtlin ngei theih nan MSACS, RNTP lam thawktute leh, NGO atangin Shalom leh Positive Network te chu theihtawp chhuahpui turin a chah a. Health Minister chuan Jail chu inhremna hmun mai nilovin mi tangte insiamthatna (rehabilitation) hmun anih nan hmalak zel anih thu leh he khawl neih thar pawh hi chutiang lama ke penna pawimawh tak anih thu a sawi a ni.
Project Nauban hi Global Fund, Indian Council of Medical Research, Central TB Division leh Dept of Health and Family Welfare; Govt of India hnuaia Implementation Research a ni a. Project Nauban in a tum ber chu Jail tangte zingah HIV leh TB veite chak zawka hriatchhuah/hmuhchhuah a ni. He research hi September 2016 a tan niin thla 18 awh tura ruahman a ni a. Central TB Division hian research a hman atan Digital X-Ray Machine hi pe in, he khawl hi research atana hman anih hnuah Prison Department kutah an hlan dawn a ni.
Digital X-Ray machine hawnna inkhawm hi Pu Sangthuama IG (Prisons) in kaihruaiin, Dr. Malsawmtluangi Ralte DD (BSD) & Principal Investigator Project Nauban in research chungchangah report a pe a, Dr . Lalhriatzuali Ralte Medical Officer, central Jail in lawmthu sawina in hun a khar a. Dr Lalhmangaihi Director DHME leh Dr. H. Lalchungnunga Director DHS in hawnna inkhawm hi hmanpuiin Health Department lam hotute an tel kim hle.
