Vawiin khan Sericulture Minister Dr B.D Chakma chuan Common Facility Centre, Lallula hmun, South Sabual-ah a hawng.
Dr B.D Chakma chuan Sericulture hna chu hmeichhiate chauh thawh tura ngaih ani chu a dik tawk lo a, ngaihdan dik lo a ni, a ti. Sericulture Minister chuan Mizoram chu sik leh sa in a zir avangin Muga Silk (Nauthak Silk) tharchhuah nana ram duhawm tak a nih thu a sawi a. Sericulture tharchhuah sum chang theite chu a hralhna lamah harsatna a awm ve lo a, hemi buaipui tur hian District tinah Marketing Counter hawn vek anih thu a sawi bawk. Dr B.D Chakma chuan Sericulture chu tharchhuah mai bakah a siam chhuah thlenga ngaituaha buaipui thei Department anih thu tarlangin, India ram mai bakah rampawn thlenga thawnchhuah tura tan lak nise, chumi tur chuan Silk quality tha tharchhuak tura hmalak a ngai a ni,a ti.
Mizoram-a Common Facility Centre hmasa ber din a ni chu lawmawm a tih thu sawiin, Sericulture Department hotute, Central Silk Board (Ministry of Textile), Zo Zia Silk leh South Sabual khaw mite thawh hona chu fakawm a tiin, a enkawl, hman leh venhim naah tan ho zel angai dawn a ni, a ti.
Bialtu MLA, Pu Lalrobiaka, ZIDCO Chairman pawhin thu sawiin, a bial chhungah Common Facility Centre hawn ani chu lawmawm a tih thu a sawi a. Pangang khawia eizawnna chu a hralhna tur a buaina awm ve lo a nih thu sawiin, tun aia tam zawk leh quality tha zawk tharchhuak turin tan kan lak angai a ni, a ti. Kalkhawm te chu mahni thawhchhuah mila incheia khawsa thin turin a fuih nghal a ni.
Pu Sarat Deori, Joint Secretary (Tech), Central Silk Board pawhin Mizoram chu Muga Silk tharchhuah theihna ram tha tak anih thu sawiin, khaw mipuite chu tha taka sawrkar thawhpui turin a sawm a ni. Common Facility Centre hi North Eastern Region Textile Promotion Scheme (NERTPS) hnuaia Integrated Sericulture Development Project (ISDP) atanga sum hmuh, cheng nuai 35.784 senga sak a ni a.
He Common Facility Centre-hi Training pawh pek theihna tura duan ani a, Technology changkang zawk leh tha zawk te pawh inzirtir zel theihna tura ruahman a ni. Mi harsa zawk leh nunau chhangchhia te pawhin puan an rawn tah theihna tura tan a buatsaih a ni a, nau awmna (Creche) pawh siam a ni.
He hun hi Pu Thlamuana, Secretary, Sericulture Department chuan a kaihruai a. Inlawmna thu Pu Lalrinmawia, Director, Sericulture Department in a sawi a. Technical Report Pu Lalremsiama, Project Co-ordinator, Sericulture Department hnen atanga ngaihthlak niin, lawmthu sawina Pu Lalrozama, Joint Director, Sericulture Department in a nei a ni.
