Lungdai zone Football Tournament Nisapui khuaa neih chu vawiin khan khar a ni a. Parliamentary Secretary Pu Hmingdailova Khiangte chu khuallian a ni.

Pu Hmingdailova Khiangte chuan Games & Sports hmasawnna tura Mizoram sawrkar hmalakna langsar zual tarlangin District tinah Boxing ring, Republic Vengah Taekwondo Hall, Zemabawkah Judo Hall, Mission Vengah TT Hall, Chaltlangah Muaythai Hall, ITI Vengah Aquatic, Hawla Indoor Stadium-ah basket ball leh wushu, Tuikualah Volleyball, Mualpuiah Rifle Shooting, Sihhmuiah Cricket, Thenzawl leh Kawnpuiah Hockey khelhna hmun siam a ni, a ti a. Lammual, Rajiv Gandhi Stadium, Chhangphut field leh Lalnema ground-ah te phullem phahin Lawngtlai, Serchhip leh Kolasib-ah te phah a ni leh dawn, Parliamentary Secretary tiin infiammi chi hrang hrang, national leh international standard nei pha turin Sawrkar chuan practise-na tur hmun a siam sak a ni, a ti. Football-a eizawng Mizo tlangval 100 rual an awm tawh a, State population atanga chhutin Mizoram chu I-League club-a player thawh hnem ber a ni, a ti bawk.

ParliamentarySecretary Pu Hmingdailova Khiangte chuan HIV/AIDS chungchang sawiin Mizorama tai darh chak tak he natna hlauhawm laka inven hi thil harsa a ni lova, fimkhur leh uluk taka nungte tan chuan he natna hi kai mai mai theih a nih loh avangin thalaite inveng fimkhur turin a chah a. Record hnuhnung bera a lan danin Mizoramah tar leh kum upa zawkte aiin thalai thi an tam zawk tih sawiin hriselna ngai pawimawha zuk leh hmuam a insum turte, ei leh in fimkhur tur leh taksa insawizawi lam uar turin thalai kalkhawmte a fuih a ni.