1437/2022-2023

Aizawl, 1^st August, 2022 : Eye Care Hospital, Dawrpui chuan vawiin khan an din champha kum 23-na an lawm a, Dr R. Lalthangliana, Minister, Health & Family Welfare Department chuan khuallian niin a hmanpui. Khualzahawm atan Health & Family Welfare Board Vice-Chairman Dr Z.R.Thiamsanga, MLA, Pi Esther Lalruatkimi, Principal Secretary, H&FW, Dr K.K.Chhetri, Director, DHME te an tang bawk a ni.

Kum 23 tlin lawmna inkhawm Eye Care Hospital-a neih ah khuallian Dr R. Lalthangliana chuan Eye Care Hospital in bul an tan dante a hriatpui tih sawiin, an bul tanna tlawmte Pathianin mal a sawm a, Eye Care Hospital neitu Dr KL Remsanga te nupa tumruhna leh taimakna, Mizoram tana thahnem an ngaihna leh an hmathlir thui tak tihlawhtling tura an inpekna zawng zawngte a fakawm tih sawiin, Mizorama cheng ten sum tam tak senga phai lam pan ngai lo tura khawvela mit enkawlna leh entirna khawl tha ber ber nei tura tan an lak dante chu a ropui takzet a ni, a ti.

Dr Thangtea chuan Eye Care Hospital-a thawkten thawhhona tha tak nena inlungrual taka hna an thawh thinna chu a entawn tlak takzet tih sawiin, a let tur beisei lova mirethei leh dinhmun harsa zawka dingte tana an luang chhuak thin chu a fakawm takzet a ni, a ti a. Hlawhtlinna kawng zawh zel turin duhsakna a hlan a ni.

Khualzahawm zinga mi Pi Esther Lalruatkimi, Principal Secretary, H&FW pawhin Eye Care Hospital hmasawnna a taka hmutu leh an bul tan tirh atanga hrechiangtu zingah a tel ve tih sawiin, Mizoram tana an rilru leh ngaihtuahna zawng zawng sengtute an ni tih a sawi a. Dr Remsanga chu sawrkar hna atanga a pension hnuah pawh chawl mail ova, thahnemngai taka mipuite tana rawngbawl tura tan a la la reng chu chhhuanawm a tih thu a sawi a ni.

Eye Care Hospital (Eye Care Centre ti a hriat ni bawk) hi August ni 1, 1999 khan din a ni a, a tirah chuan eye clinic anga bul tan niin a hnuah Eye Hospital ni tura tihchangtlun chhoh zel a ni a. September ni 19, 2020 khan Chirstian Hospital, Serkawnah Satellite Vision Centre an hawng tawh bawk a ni.

Eye Care Hospital enkawl tur hian member 7 awmna Board of Directors din a ni a. Thawktu Eye Surgeon 5, Staff Nurse 3, PMOAs 8, IV Grade 4, Optician 4 leh Visiting Surgeon (Mizoram pawn atanga lo kal daktawr thiam bik) 4 an awm a ni.

Kum 2015 July ni 1 atanga July ni 31, 2022 inkarah hian Eye Care Hospital-a mit entir mi 34974 an awm a, cataract surgery vawi 3307 tih a ni a (Small Incision Cataract Surgery – 64, Phacoemulsification Cataract Surgery – 3243). LASIK surgery vawi 1426 (Mipa – 491, Hmeichhia – 935) tih a ni a. Corneal Transplant vawi 4, Retina Treatment vawi 314, Therapeutic Botox Injection vawi 415, Squint Surgery vawi 95 tiha  ni tawh bawk a, heng bakah hian mit natna chi hrang hrang an enkawl thin bawk a ni.

Eye care Hospital hi tunlaia khawl tha leh changkangber bera thuam a ni a, vawiin hun hmannaah pawh khuallian hian an khawl thar Constellation Vision System chu a hawng a, Eye Ward thar a hawng nghal bawk a ni.