1438/2022-2023

Khawzawl, the 2nd August, 2022: Khawzawl District chhunga inbiakpawhna telecom service tih hmasawn dan tur ngaihtuahin vawiin chawhma dar 11 khan District Telecom Committee chu an Chairman Pu C.C. Lalchhuangkima, District Bawrhsap hovin DC Conference Hall-ah an thukhawm.

District Bawrhsap Pu C.C. Lalchhuangkima chuan inbiakpawhna tha chu ram hmasawnna atana pawimawh tak a nih thu a sawi a. NH 6 kawng laih mekin harsatna a thlen thin chu a hriatpui thu sawiin, mipuite chu dawhthei taka nghak hram hram turin a sawm a. 132 KV line kalna tower chungah internet fiber kaltir tha a tih thu leh hmalak tawh dan a tarlang bawk.

He hunah hian inbiakpawhna changtlung zawk a awm theih nana hmalak ngaite sawiho a ni a. ROW portal kaltlanga tower sak dilna company hrang hrang atanga lut te sawiho a ni a, hengte hi ICT Department hnenah a tul anga bawhzui tura thehluh nise tih a ni.

He hunah hian Khawzawl SP Pu Lalchhuanthanga, SDO Sadar Pu James Lalnithanga leh Line Department hotute an tel a ni.