No.7801/2020-2021

Dated Lunglei, the 15th March, 2021: Lunglei District Blindness Control Society (DBCS) leh Eye Care Hospital, Aizawl te tangkawp buatsaih ni hnih awh (15th - 16th March, 2021), a thlawna mit entirna leh enkawlna 'Free Eye Clinic with Eye Camp' Haulawng PHC-a neih mek chu vawiin khan Health & Family Welfare Minister Dr R.Lalthangliana'n a tlawh. Health Minister hi Lunglei CMO Dr LC Liana, Haulawng PHC MO Dr Lalduhawmi leh thawktu dangte leh khawtlang hruaituten anlo dawngsawng a ni.

 'Free Eye Clinic with Eye Camp'-ah hian Eye Care Hospital, Aizawl atangin Dr KL Remsanga hovin thawktu mi 10 lo kalin Guwahati atangin mi pakhat a lo kal a, vawiin a tan ni khan Haulawng leh a chhehvel khaw hrang hrang atangin mi 120 inentirin zaninah cataract surgery mamawhte chu an zai nghal dawn a ni.

Haulawng PHC-a program tawi neihah Health Minister chuan thu sawiin mipuite hmakhua ngaia a thlawna mit entirna leh enkawlna buatsaihtu DBCS, Lunglei leh Eye Care Hospital, Aizawl te chungah lawmthu sawiin an hnathawh ropui tak avangin thingtlang kilkhawra chengte leh kum upa hmun pui zawk pan theilote leh panna sum neiloten a thlawnin mit enkawlna an dawng thei dawn a ni, a ti a. An inpekna chu a entawntlak takzet ani tiin kalkhawmte chu midangte tana malsawmna ni tura anmahni zawn theuha theihtawp chhuah turin a chah a ni. Covid-19 hrileng do kawnga Mizoram mipuite inpekna leh thawhrimna avangin Health Minister chuan lawmthu a sawi bawk.

Haulawng PHC Medical Officer Dr Lalduhawmi chuan he PHC chungchang report tawi pein Haulawng PHC chuan khaw 11 bialin, bial chhungah hian population mi 6404 an awm a, thawktu mi 16 an awm a ni. Haulawng PHC hian kum 2019-2020 khan damdawiin fai leh tha intihsiakna Kayakalp ah Lunglei District PHC-te zingah lawmman pakhatna an la a ni.

Attachment

  • Loading attachment...