No.7800/2020-2021

Lunglei the 15th, Feb’2021: Vawiin chawhnu khan Higher & Technical Education Minister Dr. R. Lalthangliana chuan cheng nuai 74 (RUSA 2.0) senga sak Government J. Buana College , Multipurpose Hall a hawng.

Hawnna inkhawm hi Pu R.Lallianzuala, Jt. Director, H&TE in kaihruaiin H&TE Minister Dr.R. Lalthangliana chuan RUSA sum hmanga Govt. JB College Multipurpose Hall thatak hawn thei a lo awm chu ropui ati a, zirlai leh zirtirtu ten tangkai taka an hman theih nan duhsakna a hlan ani.  Govt JB College chuan hmasawnna ruhrel leh zirna lamah te kawng hrang hranga hma an sawn chu lawmawm a tih thu sawiin heng hmasawnna ruhrel te hian zirna leh college hmalakna hrang hrangah hmasawnna tam tak a thlen ngei a beisei thu a sawi. Zirlai te chu an zirlai ngai pawimawh hmasa ber tur leh tum mumal nei a, midangin a an tih theih chu enge ka tih theih loh bik ang tih rilru pu chunga tan la theuh turin a chah ani. College zirtirtu te pawn an zirlaite mihring chhawrtlak a chherchhuah a ngai thu a sawi bawk. Govt. JB College hi Lunglei khawpui chhunga awm a hmun hma hi zau nghaina a awm loh avangin Melte ram ah Campus thar ram 10 bihga atan DPR thatak siam a hmalak sak  anih tur thu a sawi a. College ten sawrkar laipui atanga RUSA sum dawng zel turin National Assessment and Accreditation Council (NAAC) endikna hlawhtling taka an hmachhawn thin a tul thu sawiin Mizorama college zawng zawngte hemi kawnga tha thlah lova tan la reng tura a duh thu H&TE Minister chuan a sawi a ni. 

Dr. R. Lalthangliana chuan Mizoram chu Covid-19 do kawngah India rama thawk tha berte zing ami kan nih thu leh tun dinhmunah Covid-19 vanga nunna chan tlem berna state kan nih thu sawiin hei hi department thawktute, VLTF-te, kohhran leh Mizoram mipui tan hona rah a ni a ti a. Mizorama Cancer Superspeciality Hospital din turin JICA kaltlanga hmalak mek anih thu sawiin Health Minister chuan Health Infrastructure changtlung tak nei tur leh Health Education lama hmasawn zel turin department chuan theihtawp a chhuah thu a sawi a. Commmerce & Industries department chungchang pawh sawiin Minister chuan Bangladesh nena insumdawn tawnna ti hlawhtling thuai tura hmalakna a kal mek thu leh hemi chungchang bawhzui zel turin tun kar Friday (19th March 2021) hian Bangladesh sawrkar laipui mi pawimawhte hmu tura Dhaka kal a tum thu a sawi a ni. 

Prof.J. Zorema, Principal. Govt. J. Buana chuan H&TE Minister leh H&TE hotute hmalakna avangin  Multipurpose Hall thatak  hman theia a awm hi lawmawm ati a, an chungah lawmthu a sawi ani. Govt, JB College hi kum 1983 a din ani a, Arts leh Commerce zirna niin zirlai 454 an awm a, zirtirtu regular 21, contract 9, part time 2, Rusa 3, Casual Faculty 5 leh non teaching staff te an awm ani. 

Er.Joshua Lalthakima, AE, RUSA, H&TE chuan Technical report pein Govt. JB College Multipurpose Hall hi  chu RUSA 2.0 sum cheng nuai 74 sengin  September 2019 khan Skyridge Construction & Consultancy, Aizawl ten an sak tan thu asawi a. Hall hi a dung 131 feet  a vang 28 feet a ni..