No.7799/2020-2021
Aizawl, the 15th March 2021 : Vawiin khan Food, Civil Supplies & Consumer Affairs Minister Pu K. Lalrinliana'n CYMA Hall, Tuikhuahtlangah MCU General Headquarters leh Food, Civil Supplies & Consumer Affairs tangkawpin World Consumer Rights Day an buatsaih a hmanpui.
Minister Pu K. Lalrinliana chuan consumer te dikna leh chanvo humhalhna leh an chan tur ang an chan thei nana hmalakna kawngah mi huat hlawh a awl thu sawiin, mahse hengte hi mipuite, a bik takin consumer-te hmakhua ngaia kan tih a ni a, tu emaw huat vanga thil tih a ni lo a ti. Hemi kawngah hian Mizo te kan thanharh a ngai tiin, invenpui tawn a ngaih thu te a sawi a. Department leh MCU te thawhhona tha hi kan tih chak lehzual a ngai a ni, a ti bawk.
Supply Minister chuan khawvelah duhamna a nasat tawh avangin company te leh thilzuar chi hrang hrangten mipui an bum fo thin a, hengah hian buk tling lo te, bawma thil pack a buk zat ziah lan lohna te, thil siam chi hrang hrangah a siam ni inziah lohna te hi hmuh tur a awm nual tawh a. Hengah te hian legal metrology in a theih ang angin hma an a la, mahse thawktu indaih lohna avangin duhthusam erawh a la thleng lo niin a sawi.
Kumin World Consumer Day thupui chu tunlai khawvel boruak nen a inmil hle tiin, plastic hi khawvel hmelma emaw tiin a ngaih theih a, chuvangin hman nawn fo loh te leh hman tlem te hi mitinin kan tihmakmawh tur a ni a ti.
Minister hian District Consumer Disputes Redressal Commission tha bera thlan Aizawl District leh District Consumer Association ti tha bera thlan Serchhip District hnenah lawmman “Award” a hlan a. He hunah hian Consumer Awareness chungchanga Department in documentary video leh video clip tawi insiamsiak a buatsaih lawmman pawh Minister hian a sem bawk a ni. Documentary competition-ah 1-na chu Pu C. Lalbuatsaiha niin, 2-na chu Pu C. Lalramngaia a ni a. Video clip competition ah hian 1-na chu Apropos Play niin, 2-na chu Pu Vanlalhriatpuia a ni a, 3-na chu Pu C. Lalbuatsaiha a ni.
He huna thusawitu dang Dr. Lalhriatzuali Ralte, IAS, Aizawl DC chuan kumin thupui plastic chungchang sawi zauin plastic in bawlhhlawh a siam a veiawm zia te a tarlang a ni.
Pi Ramdinliani, Director, F,CS & CA pawhin a thusawi a Consumer te dikna leh chanvo bakah consumer te lungawilohna thehluh thu rem chungchang te a sawi a ni.
Programme hi Pu Vanlalngaihsaka, IAS, Secretary, Food, Civil Supplies & Consumer Affairs Department in kaihruaiin he ni tobul te, consumer te dikna leh chanvo leh India rama hemi chungchanga dan leh hrai kan neih te a sawi. Pu C. Laldawngliana General Secretary Mizoram Consumers Union hnena atangin MCU hmalakna te ngaihthlak a ni. Prof. Chawngsailova, President, MCU pawhin thu a sawi a ni.
World Consumer Rights Day hi kum 1962 atang khan USA ah hman tan niin, tunah chuan he Ni hi khawvel pumah hman thin a ni tawh a. Kumin thupui chu 'Tackling Plastic Pollution' tih a ni.
