No.7798/2020-2021

Dated Aizawl, the 15th March, 2021: Vawiin chawhnu khan Aijal Club ah Mizoram chhunga  Mahatma Gandhi National Rural Employment Guarantee Scheme (MGNREGS) hnuaia hna chi hrang hrang thawhna a hman tur Rural Development department buatsaih Schedule of Rates (SoR), chungchang zirhona buatsaih a ni a. He hun hi Rural Development department Minister Pu Lalruatkima'n hmanpuiin, Rural Development department officer-te, DRDA Project Director leh Block Development Officer-te an tel a ni.

He hun hmanpuitu RD Minister Pu Lalruatkima chuan Rural Development department hnuaia thawk Mizoram hmun hrang hrang ami te thawhrimna leh thahnemngaihna azarah kum 2019 leh 2020 chhung khan ni 100 inhlawhna siam a ni a, COVID-19 vanga harsatna kan tawh chhung kum 2020-a ni 100 inhlawhna siam avang khan Job card nei mi nuai 2 chuangin Rs. 25,000/- vel theuh an la thei a, hripui laka kan tawrhna tihnep kawngah pawh nasa takin min pui a ni, a ti. Minister chuan Rural development department chu thingtlang mite innghahna leh retheihna laka khaichhuak tura thawktu an nih ang ngeia, innghahna tlak ni chhunzawm zel tura tan la turin a fuih a ni.

Minister chuan DRDA Project Director-te leh BDO te chu an hnuaia thawkte uluk taka an vil thin avangin an hnathawh a tha thin a ni, a ti a. Bial chhunga hnathawhte a hmunah a tam thei ang ber enpui hian kan hnathawhin belhchian a dawl phah thin a, mahni inrintawkna pawh kan neih belhchhah phah thin a, sawiselna kan tawng a nih pawhin rilru nat aiin insiamthat nan hman kan tum zel dawn nia, a ti a. District thar pathum - Saitual, Khawzawl leh Hnahthialah DRDA office hawn thuai a nih tur thu a sawi bawk. 

MGNREGS hnuaia hnathawna atan hian Mizoram PWD SoR hman thin a ni a. Rural development department in SoR thar ruahmanin hei hi sawrkar laipui pawhin a pawmpui tawh a, April, 2021 atangin hman tan tur a ni ang. Mizoram hi India ram State zingah MGNREGS SoR nei hmasa pawl a ni a. SoR tharah hian Job card neitute hriselna, kum zat leh an taksa dinhmun atanga tehin hnathawhna tur rate bithliah fel vek a ni.