1764/2022-2023

Aizawl, 31st August, 2022 : Health Minister Dr R. Lalthangliana chuan vawiin khan Civil Hospital, Aizawl-ah HDFC Bank Corporate Social Responsibility (CSR) programme “Parivartan” kaltlanga an hlan ICU khum 10 leh hemi in a ken tel hmanraw chi hrang hrang cheng nuai 70 chuang hu a hawng. Health M inister hi Health & Family Welfare Board Vice-Chairman Dr ZR Thiamsanga, MLA, H&FW official pawimawhte leh HDFC bank hotuten an tawimawm a ni.

He hun puala inkhawm Doctors’ Seminar Room, Civil hospital, Aizawl-a neih ah Health Minister Dr R. Lalthangliana chuan HDFC Bank in Civil Hospital, Aizawla ICU khum 10 leh mamawh dang hmanraw pawimawh tak tak an pe chu thil chhinchhiahtlak a nih thu sawiin Mizoram sawrkar leh Zoram mipuite aiawhin lawmthu a sawi a, tunhnaiah Lunglei Civil hospital leh Siaha District hospital tan motorised ICU khum panga leh hmaraw pawimawh engemawzat an hlan tawh tih a sawi a, Mizoram tana thahnem an ngaihna a ropui tih sawiin a theih a nih chuan District danga hospital te tihchangtlunna tura hma lak dan kawng ngaihtuahsak leh turin a ngen a ni.

Dr R. Lalthangliana chuan Civil Hospital, Aizawl chu Mizoram hmkun kil tin atanga pan a nih thu sawiin a bik takin private damdawi ina inenkawl ve thei lo mi harsa zawkten an pan nasa lehzual a, heng kan thil neih tharte pawh hi tangkai takin kan hmang ngei dawn a, hei hian damdawi ina thawktute pawh phurna a pe ngai dawn a ni, a ti.

Health & Family Welfare Board Vice-Chairman Dr ZR Thiamsanga, MLA pawhin  HDFC bank kaltlanga malsawmna kan dawng thin hi a lawmawm takzet a, tun tum mai bakah hian COVID-19 hripui leng dona kawngah nasa takin HDFC CSR kaltlangin tanpuina kan dawng tawh a, Civil Hospital, Blood Bank pawh vawi duai lo tanpuina an lo pe tawh thin a ni tih sawiin HDFC bank chu hmasawn zel turin duhsakna a hlan a ni.

HDFC Bank hian an Corporate Social Responsibility (CSR) programme “Parivartan” kaltlang hian ICU khum 10 tuna an pek bakah hian June ni 16, 2022 khan Lunglei Civil Hospital leh siaha District hospital tan Motorised ICU Bed - 5, Multi Para Monitor - 5, Suction Machine - 5, BiPAP Machine - 5, CPAP Machine - 5, Ventilator - 2, bak ah Median Transport Ventilator - 3 ve ve an lo hlan tawh a. COVID-19 hripui dona atan kum 2020 khan Rs. 13,75,000/- man hu hmanraw chi hrang hrang Mizoram sawrkar hnenah an hlan tawh bawk a, Civil Hospital, Aizawl Blood Bank tan thisen pekna hmanraw chi hrang hrang bakah thisen petute eitur chi hrang hrang an hlan reng thin bawk a ni.

HDFC bank in vawiina Civil Hospital, Aizawla an thil hlan hi ICU khum 10 bakah a ken tel ventilator, oxygen cylinder, ECG khawl, infusion pump leh thil dang dang avaiin khum pakhat tan hmanraw chi hrang hrang 17 theuh a ni.

Vawiina ICU, khum hlanna pual inkhawm hi Dr Zoramthanga, Medical Superintendent, Civil Hospital, Aizawl-in a kaihruai a, HDFC bank aiawhin Pu Rajnis Sarda, RBB, Cluster Head leh Pu Muskaan Singh, National Head, Govt. & Instn. ten thu an sawi a, Pu Mausam Mojumder, State Head, Govt. & Instn., HDFC Bank leh Dr Lalchhuankimi, Dy. Medical Superintendent, Civil Hospital, Aizawl ten lawmthu sawina hun an hmang a ni.