Vawiin khan Health Minister Pu Lal Thanzara’n Armed Veng ‘S’ Health Clinic a hawng. Hawnna inkhawmah hian bialtu MLA Finance Minister Pu Lalsawta pawh a tel a ni.

Pu Lal Thanzara chuan ram changkang tehna pawimawh tak chu hriselna a ni, a ti a. Sorkar laipui pawhin a mite hriselna ngai pawimawhin hma a la a, National Health Mission (NHM) hnuaiah programme hrang hrang duangin hna a thawk mek a ni, a ti. Health Minister chuan Aizawl Civil Hospital a lo tawt tak em avangin hmun thawl zawk Falkawn Referral Hospital-ah doctor leh nurse engemawzat dah an ni a, mipui leh thawktute’n awlsam taka he hmun an pan theihna tur hian State Transport Minister chuan ruahmanna siamin naktuk atang hian sorkar bus service tan tir tum a ni, a ti. Khawtlang hruaitute thahnemngaihna avanga Armed Veng ‘S’ mipuite chhawr tangkai theih tur Health Clinic hawn a ni ta chu lawmawm tiin sorkara innghat mai lova he Health Clinic puitlinna tura tha an lo thawh tawh chu chhunzawm zel turin Health Minister chuan Armed Veng ‘S’ mipuite a sawm a ni.

Bialtu MLA Pu Lalsawta, Finance Minister pawhin Health Department chu mipuite ngheng reng a hnathawk, mipuite tana rawngbawltu an ni a, khaw thlang sorkar ropui tak takah te pawh ram mipuite hriselna kawnga hna an thawh dan hi sorkar tha tehfung pawimawh tak a ni tiin mipui an hrisel loh chuan hmasawnna hnathawh hian awmzia a nei lo a ni, a ti. Pu Lalsawta chuan a bial chhung Armed Veng ‘S’ mipuite mamawh tak Health Clinic hawn a ni ta chu lawmawm a ti a. He Clinic hawn a nih theihna tura tha thawhtu Armed Veng ‘S’ khawtlang hruaitute leh chhungkaw tinte chungah lawmthu a sawi a ni.

Armed Veng ‘S’ Health Clinic hawnna inkhawm, an Local Council Chairman Pu T.Lalropuia kaihhruaiah hian bialtu AMC Councillor Pu PC Lalhmingthanga leh Aizawl East Chief Medical Officer Dr Lalzepuii te bakah Armed Veng ‘S’ Local Council member-te leh tlawmngai pawl hrang hrang hruaitute an tel a ni.