Vawiin chawhnu khan Durtlang North-a New Life Home Society din champhaphak vawi 25-na, Silver Jubilee lawmna buatsaih a ni a. He hunah hian Health Minister Pu Lal Thanzara chu khuallian niin Jubilee lungphun a hawng nghal a ni.

Silver Jubilee lawmna inkhawmah hian Pu Lal Thanzara chuan New Life Home Society in hmeichhe rahbi tleu te tuamhlawmna tur leh an tlukluhna tur hmun Jeriko Khualbuk an lo din chu lawmawm a tih thu sawiin heng mite tana rawngbawltute inpekna a ropui takzet a ni, a ti. Mizote chu chanchintha hmangin Pathianin a zawng chhuak a, he chanchintha in a ken tel tlawmngai pawl hrang hrang lo dingte’n Pathian rawngbawl hna chunzawmin khawtlang tan thil tha tam tak an ti a, hei hi Mizote vanneihna a ni, a ti a. Ram mipuite’n khawvel thila hmasawnna an neih theih nan Pathianin politics a ruat a. Kohhran leh politics hi pheikhairual taka a kal phawt chuan ramin chak takin hma a sawn ang tiin Pu Lal Thanzara chuan thlarau lama pachhe chunga tisa lama hmasawnna chuan awmzia a nei lo a ni, a ti.

New Life Home Society hi mi thahnemngai thenkhat te’n 7.3.1990 khan an din a. An Home hming atan Luka 10:30-37 tlawhchhanin ‘Jeriko Khualbuk’ an vuah a ni. He society in a tum ber chu thalaite’n nunkawng dik an zawh theihna’n a enkawl a, hunawl hman that dan zawn sak leh an chhungkua leh khawtlang tana tangkai tura chherchhuah te; sorkar in dan a siam (social legislation) hnuaiah hmeichhiate kaihhruaia a tul dan anga enkawlna in (institution) din leh enkawl te; hmeichhiate dinhmun chawi kan nana eizawnna tlak thiamna zirtir te; vantlang hnena hmeichhiat mipat kawnga hmeichhe humsual dai leh ruihhlo ngaite chhawmdawl leh enkawl dan hriattir leh zirtirna pek te a ni.

New Life Home Society chuan United Nations Office on Drugs and Crimes (UNODC) te nen tangkawpin CHARCA, 1-49, H-13, E-41 project te leh DFID-Peer Led Invention Project hmangin hna a thawk thin a. Tunah hian Beauty Culture, puan thui leh embroidery te an zirtir a ni. Ministry of Social Justice & Empowerment nena tangkawpin De-addiction Centre, Jeriko Khualbuk project hmangin hna a thawk mek bawk.

Silver Jubilee lawmna inkhawm hi an Chairman Pi B.Sangkhumi’n a kaihruai a. Khuallian Pu Lal Thanzara hian New Life Home Society Silver Jubilee Souvenir leh Pi B.Sangkhumi ziak ‘Mizo Khawtlang Nuna Sualna Hnukpui Chhuichianna leh a Damdawi’ tih lehkhabu a tlangzarh nghal bawk.