Mizoram State Sports Council-in Special Plan Assistance hmanga cheng nuai 100 senga an sak Zotlang Sports Complex chu vawiin chawhnu dar 2:00 khan Sports & Youth Services Minister Pu Zodintluanga’n a hawng.
Hawnna thu sawiin Minister chuan Zotlang Sports Complex chu opposition MLA a nih lai atanga a lo buaipui tawh thin thu te tarlangin tha taka tihpuitlin a ni thei ta chu lawmawm a tih thu a sawi a. Mizoram Sawrkar chuan thalaite hmakhua ngaipawimawha infiamna lama hma an sawn theih nana kawng hrang hranga hma a lak chhoh dan te a tarlang a. Lammual chu phullem tha tak leh gallery bakah zan lama inkhelh theih tura lighting system nen changtlung taka siam a nih thu te, Rajiv Gandhi Stadium leh khelmual changtlung tak tak te khaw hrang hranga siam a nih tawh bakah Judo leh Taekwondo Hall te pawh siam zawh tep a nih thu te a sawi lang a. Harsatna hrang hrang pal tlanga Zotlang Sports Complex siam zawh a ni thei chu lawmawm tiin thalai ten tangkai taka hmang turin a chah bawk. Tennis Coach lak thar a nih thu sawiin Minister chuan a tihdan hmang dik taka thalai ten Tennis an zir theih nan coaching pek an nih tur thu a puang bawk. Minister hian P.C.Lalmuanpuia Memorial Basketball Tournament a hawng nghal a, Zotlang Basketball Club leh Tennis Club te hnenah infiamna hmanrua te a hlan bawk a ni.
Khualzahawm Pu K.Lalrinthanga, Parliamentary Secretary chuan Minister chak tak hnuaiah infiamna chi hrang hrang atana hmun changtlung tak tak Mizoram ah siam a ni chu lawmawm tiin ram pumah pawh Mizo infiam mi ten hriat an hlawh tawh chu a hlawhtlinna a ni, a ti a. Thahnemngai taka tih chuan a hlawhtlinpui zel theih a ni tih hriaa thalai te chuan theihtawp chhuaha Sawrkarin infiamna hmun tha tak tak a siam te chu hmang tangkai zel turin a chah bawk.
Zotlang Sports Complex hawnna inkhawm hi Sports & Youth Services Secretary Pu Zothankhuma’n a kaihruai a, Mizoram State Sports Council Secretary Pu C.Laltlanthanga’n technical report a pe bawk. Zotlang Local Council Chairman Pu C.Lalzamlova pawhin Sports Complex hlawhtlin nana hma la tu zawng zawngte chungah leh Mizoram Sawrkar leh Mizoram State Sports Council chungah lawmthu a sawi bawk. Sports Complex hawnna ah hian AMC Executive Councillor Pu Lalzirliana bakah sports association hrang hrang hruaitute leh khawtlang hruaitute an tel a ni.
Zotlang Sports Complex ah hian Basketball Court pakhat leh Tennis Court pakhat a awm a, thlirtu mipui 250 thutna gallery a awm ve ve bawk a ni.
