Vawiin khan Health Minister Pu Lal Thanzara chuan Synod Conference Centre-ah Health Multipurpose Service Association (HMSA) General Conference vawi 33-na a hmanpui.

Pu Lal Thanzara chuan kan hna hi Pathian rawng kan bawl theihna kawng a ni tih hriain Health Department a thawktute phei chu damlote enkawl tura Pathianin a dah an nih avangin missionary thinlung pua hna an thawh a ngai a ni, a ti a. Health Worker te chu Health & Family Welfare Department kutke ber an nih inhria a thahnemngai taka thawk turin a chah. Hmun kilkhawr tak takah mamawhna a sang lehzual emaw tih turin sawrkarin doctor a dah theihlohna hmunah phei chuan Health Worker-te mawhphurhna a sang hle a ni, a ti a, an service chungchanga mamawh an thlen pawh ngun taka a enzui tur thu a sawi a ni. Health Minister chuan sawrkar hmalakna thenkhat tarlangin sawrkar laipuiin National Health Mission kaltlanga Cancer Hospital sakna tur sum thawhkhatna (1st Installment) a pek tawh thu leh he sum hmang hian Hospital mamawh instrument lei pawh phalsak an ni, a ti a. Medical College nei tura hmalakna pawh tluang taka kalin College awmna tura ruahman Falkawna State Referral Hospital hian ni khatah OPD-a damlo pantu mi 400 tal an neih a tul avangin Aizawl Civil Hospital atangin Department thenkhat sawn an nih leh tur thu a sawi a, endiktute tur team-te kum thar January hian an lo thleng dawn tih a sawi bawk.

Health Principal Director Dr. K.Ropari pawhin thu sawiin Health Worker-te chu hmun kilkhawr atanga khawpui thleng dap chhuaka mipui hrisel nana hnathawktu, sawrkarin health programme a duan hrang hrang kengkawhtute an ni avangin an mawhphurhna a sang hle a ni, a ti a. Khawi hmunah pawh awm sela rinawm leh taima taka thawk tura chahin an harsatna tawhte pawh a hriatpui thu leh department anga a theih dan kawnga enpui zel a tum thu a sawi a ni.

Ni hnih chhung awh tur HMSA General Conference vawi 33-na hi naktuk tlaiah a tiak dawn a. Hawnna inkhawm hi an pawl Vice President Pu V.Lalchhuanga’n a kaihruai a. HMSA President Pu Mangchungnunga’n kalkhawmte lawmna leh kum khat chhunga an pawl hmalakna a sawi a. An member boralta te sunna hun an hman bakah ralna an hlan bawk. Naktuk December ni 10 hian rorel inkhawm leh hruaitu thar thlanna hun an hmang ang.