Serchhip District chhunga Sansad Adhars Gram Yojana (SAGY),Model Village tia hriat chungchangah vawiin khan Serchhip DC office ah Chief Minister Pu Lal Thanhawla chuan sorkar department hrang hrang hotute meeting a neihpui.

Chief Minister chuan model village a khaw thlan mipuiten beiseina an nei sang a, mahse kalpuina turin a hranpaa sum dah anih loh vang leh sum harsatna avangin tihpuitlin vek a harsat tur thu a sawi a. Chuvangin MP leh MLA ten an fund neih ang te tangkai taka hmang thei se a duhawm hle a ni a ti a. SAGY hi kan hrechiang chho zel a, state sum pawh hman angai ve ang a ti a. Tihpuitlin hun chhung tura ruahman hi kan tlai deuh avangin department tinte chu tan la hle tura chahin, a kaihhruaina angin theihtawp chhuah turin a chah a ni.

Chief Minister chuan tul hmasa ber tur chu baseline survey neih a ni tiin, model village in thil tam tak a keng tel a, mipuiin an zawm that chuan nasa takin an tangkaipui thei ang a ti. Prime Ministerin India ram changkan hun chu thingtlang khuate an changkan hun hun a ni a tih chu Chief Minister hian dik hle a hriat thu sawiin, Serchhip District chu dik ber nih tum turin a chah a. Line departmentte bakah a dangte pawh inhnamhnawih ve se a ti a, hemi atan hian thawhhona tha, coordination a pawimawh hle dawn a ni a ti. Heng bakah mipuite tel ve a pawimawh hle dawn bawk a ni a ti.

Meetingah hian MLA tinte ngaihpawimawh zual bikte an thlirho a ni.

Serchhip District chhungah hian Model Village 7 thlan a ni a. Chief Ministerin a bial chhungah Buangpui khua a thlang a, Pi Vanlalawmpuii Chongthu in N.Vanlaiphai thlangin, Er. Lalrinawma, Tuikum bialtu in Chhingchhip a thlang bawk a ni. Heng bakah Serchhip District pawn MLA 2 Pu Vanlalzawma, Aizawl West III bialtu in Baktawng a thlang a, Pu Lalruatkima,Aizawl West II bialtu in Khumtung thlang bawk a ni. MLA te bakah Mizoram mipui awiawh MP 2, Pu C.L.Ruala, MP(LS) in Khawlailung a thlang a, Pu Ronald Sapa Tlau, MP(RS) in Chhiahtlang a thlang bawk a ni. Chief Minister chuan Serchhip district pawn MLA te leh MP ten Serchhip district chhunga model village an thlang chu lawmthu a sawi a ni.