244/2023-2024

Champhai, the 27th April, 2023: Vawiin chawhnu khan Health & Family Welfare Minister Dr. R.Lalthangliana chuan Hnahlan khua tlawhin a enkawl Department hmalaknate a enfiah. Minister hi bialtu MLA Dr. ZR. Thiamsanga, Vice Chairman, Health & Family Welfare Board chuan a tawiawm a ni.

Amah lawmna pual inkhawm Hnahlan PHC tuala buatsaihah Dr. R. Lalthangliana chuan hriselna kawnga Champhai District tana Sawkar hmalakna hrang hrangte tarlangin, District Hospital Champhaiah damlo nazual leh natna khirhkhante a bik tana enkawlna Critical Care Block (CCB), khum 50 awmna tur cheng vaibelchhe 20 senga din tum a ni, a ti a. Health Sub-Centre te Health & Wellness Centre-ah hlankai niin, Health Sub-Centre awmlohna hmunahte Health Clinic dah a ni, a ti bawk a. PHC leh CHC ahte nizung chakna hmanga eng pekna tur buaipui mek a nih thu leh, Health Clinic-te bungraw mamawh nena thuamthat vek tum a nih thu a sawi bawk a. Urban PHC Mizoramah 9 neih a nih tawh thu leh, Aizawl, Lunglei leh Champhaiahte kalpui mek a nih thu a sawi bawk.

Health Minister chuan Hnahlan khawtlangin zirna tih changtlung kawnga mamawh an thlente a tul anga enzui a nih tur thu a sawi a. Hnahlan PHC ah Portable X-Ray dah thuai tum a nih thu leh, Khuangphahah Health & Wellness Officer dah thuai tum a ni, a ti a. India rama Covid-19 dona kawnga thawktha bik 5 thlan chhuah zinga mi bialtu MLA, hriselna kawnga hma la tha tak an nei chu a lawmpui thu a sawi bawk.

Commerce & Industries Minister ni bawk chuan ramri depa awm Hnahlan khua chu insumdawntawnna tura khaw pawimawh tak a nih thu a sawi a. Border Hut ataka kalpui tura bawhzui zel a nih thu leh, Sawrkar laipui Ministry of Commerce-te dawr reng a nih thu a sawi a. Tunhnaia India rama Border Trade lian chi tihna tur hmun thlan chhuah 25 zingah Zokhawthar leh Zorinpui a tel chu lawmawm a tih thu sawiin, Mizoram tana chhawrnahawm tak tur a ni, a ti bawk.

H&FW Board Vice Chairman Dr. ZR. Thiamsanga chuan Health Minister-in Hnahlan khua tlawha hriselna kawnga hmalaknate a hmun ngeiah tlawha a enfiah chu lawmawm a tih thu a sawi a. Hripui leng avanga harsatna tawh karah theihtawp chhuah a nih dante tarlangin, Covid-19 hrileng hnuah health infrastructure nasa taka tih changtlun a nih thu a sawi a. ICU khum engemawzat neih belh a nih thu leh Oxygen tlakchhamna a awm lohna turin District hrang hrangahte Oxygen Plant bunfel a ni, a ti a. Health Minister hmalaknaa Hnahlan PHC a Doctor dah thar a ni chu lawmawm a tih thu a sawi a. A bial chhunga Health Sub-Centre te Health & Wellness Centre-ah hlankai an nih thu leh, Health Sub-Centre awmlohna hmunahte Health Clinic hawn a nih thu a sawi a. Nimin maiah District Hospital Champhaiah RT-PCR Laboratory, Naupang ICU leh Trauma Centre hawn a nih thu leh heng bakah hian Dialysis leh ICU te kalpui reng a nih thu a sawi bawk.

He hun hi Pu Lalremruata Cherput, VCP Hnahlan chuan a kaihruai a. Pastor Lalnunthara'n hunserh a hmang a. Pu DL Zadinga Hnamte, President Chhimveng Branch YMA-in kalkhawmte lawmna thu a sawi a. Dr. PC Lalramliana, Principal Director, H&FW Department hnen atangin thusawi ngaihthlak a ni bawk.

Heath Minister hian vawiin chawhnu vek khan Hnahlan Winery tlawhin thawktute a kawm a; Winery kalpui dan leh hmalak dante a enfiah a ni.

Heath Minister hi Dr. Vanlalsawma, Director of Health Services, Dr. Eric Zomawia, Mission Director, NHM, Dr. PC Lalhmingliana, CMO leh Dr. Lallawmkima, DIPRO te'n an tawiawm bawk a ni.