493/2022-2023
South Tuipui bialtu MLA leh Health Minister ni bawk Dr.R.Lalthangliana chuan vawiin khan District Hospital Hnahthial-ah Eye Care Hospital ten Eye Camp an buatsaih mek a tlawh a. Eye Care Centre ten hmanraw changkang tak tak nen zan 4 ngawt riaka Clinic an buatsaih thei chu bialtu MLA a nihna angin lawmthu a hrilh a ni.

Health Minister Dr R. Lalthangliana chuan Boeing Company hotu ten tun hnaiah Portable ECG khawl 4 an pek zinga pakhat chu vawiin khan District Hospital Hnahthial hnenah hian hlan nghalin Mizoram a damdawi In 60 an pek dawn thu leh kumin July vel hi chuan pek kim hman beisei a nih thu a sawi a, Mizoram a PHC zawng zawngah Boeing Company tho hian kumin hian portable X-ray khawl pawh an pek vek dawn bakah Aizawl Civil Hospital tan kumin kum tawp lamah Cheng Nuai 600 - 700 vel man MRI khawl an pe dawn tih a sawi bawk a ni. World Bank pawisa hmangin Hnahthial-ah Chief Medical Office tur pawh sak mek a nih thu sawiin Dr E. Lalthangliana chuan District khawpui hrang hrangah khum 50 awm theihna tur AYUSH building sak a nih dawn thu leh a hmasa pathum atan Aizawl, Champhai leh Hnahthial-ah bul tan thuai a ni dawn tih a sawi a, "thawktu tur pawh lak vek an ni ang a, State sorkar-in engmah kan tum a ngai lo a ni" tiin Quarters sak thatna turte pawh ruahmanna siam a nih thu a sawi bawk a ni.

Kum 2019 a Mizoram Health Departpment hnuaia hna lak tur chi hrang hrang 734 an ruahman, Covid-19 hrileng avanga lak theih tak loh te chu Covid-19 a kiam deuh hnu hian Chief Minister hovin DP&AR hotute nen hmalak dan tur ngaihtuahin an thutkhawm dawn thu Health Minister chuan sawiin "kumin kum laihawl emaw hi chuan a zualpui ngawih ngawih ang chi hi kan lak belh maithei a ni" a ti.

He huna inkhawm tawi hi Dr.Lalrengpuii Ralte, CMO chuan kaihruaiin Eye Care Hospital neitu Dr.K.Lalremsanga chuan Hnahthial-a Eye Camp an buatsaih dan sawiin mi 300 chuang mit endik sakin mi 30 vel an zai sak a ni.