Indian Medical Association (IMA) Mizoram State Branch Annual Conference vawi 41-na hawnna inkhawm, Aijal Club-a neih chu vawiin khan Health & Family Welfare Minister Pu Lal Thanzara chuan khuallian niin a hmanpui.
Health Minister Pu Lal Thanzara chuan medical field a hmasawnna tur chuan tanrual a tul thu sawiin hmasawnna atan professional body hrang hrang, mithiam, khawl tha leh changkang zawkte, zirna hmun tha leh research lama hmalak te a pawimawh a ti a. IMA in thiamna leh hriatna ti hmasawn tura Meeting leh CME an buatsaih thin te, mipui zirtirna leh hriatna dik pe turin TV leh Media-a program an buatsaih thin chu lawmawm a tih thu a sawi a. Health Minister chuan Doctor-te chu an thawhna apiangah sawrkar, mission hospital leh private clinic pawh nise mipui hriselna leh dam nan an thawk a ni tih hre renga, sawrkar program leh policy te tawiawm a thawh ho puiah a sawm bawk a ni.
Pu Lal Thanzara chuan sawrkarin Medical College din tura theihtawpa hma a lak mek thu leh faculty leh thawktu tur post pawimawh zual thahnem tak siam thar niin henga post pawimawh zual te chu rang taka tihfel anih theih nan “Single Window” system a tihfel tum a nih thu a sawi a. Heath Minister chuan IMA te chu Medical College neih tuma hmahruaitu an lo nih tawh angin he project lian takah hian sawrkar thawhpuitu leh finchhuahtu ni zel turin a chah a ni.
IMA hi India ram pum huapa doctor-te insuihkhawmna pawl niin medical science in hma a sawn zelna turin hna a thawk a, mipui zirtirna leh enkawlna kawnga hma latu pawl pawimawh tak a ni. IMA Mizoram State Branch hi kum 1972 a din niin tun dinhmunah member 668 an nei a ni. November ni 23, 2017 khan IMA House & Multipurpose Center sakna tur Falkawn-ah Health Minister Pu Lal Thanzara chuan lungphum a phum a ni.
Pre-conference workshop hi November ni 29, chawhnu lamah Aijal Club-ah tanin mithiam hrang hrangin zirtirna an pe a. Medical Council of India (MCI) a Mizoram representative tur thlanna neih niin Dr. John Zohmingthanga chu thlan a ni.
IMA Conference hawnna inkhawm hi IMA, Mizoram Branch President Dr. Vanlalruata’n a kaihruai a. Hony.Secretary Dr.John Zohmingthanga’n kum khat chhunga an pawl hmalakna hrang hrang a tarlang a, an hmalakna langsar zingah IMA-MGDA leh Health Department te nen tangrualin March ni 8-10, 2017 khan Zawlnuam-ah Multispecialty Clinic an buatsaih a, he Clinic ah hian a thlawnin damlo 1412 chuang enin damdawi pawh a thlawn vekin an sem a, cataract 10, glaucoma 2, refractive error 180, gall stone 19 leh cancer 1 an hmuchhuak a ni. Conference-ah hian an member boral Dr T. Lalrochunga leh Dr. Lalbuatsaiha Ralte te sunna hun an hmang a, IMA Asst. Secretary Dr. Chawnglungmuana chuan lawmthu sawiin hun hnung a khar a ni.
