Vawiin hian Serchhip DC Conference hall ah National Election Quiz Inter School Contest chu Serchhip District Steering Committee on District Contest ten an buatsaih a. District chhung School pasarih atangin zirlai naupangten intihsiakna an nei.

He intihsiakna (Exam) hi vawiin vek hian endik nghal niin, tlai lamah lawmman semna buatsaih leh nghal a ni a. Lawmman semna hun hi Pu Abraham B. Khithei, MCS, Election Officer chuan kaihhruaiin District Election Officer leh Bawrhsap ni bawk Pi Sangchhin Chinzah chu khuallian a ni.

Pi Sangchhin Chinzah chuan, India ram chu Democracy ram a nih avangin khua leh tui, kum 18 tling chin ten ram hruaitu atana an mi duh an thlang thin a. Village Council atanga kan ram rorelna sang bera thu MP te thlengin kan thlang thin a ni. Hetiang chanvo kan nei bik hi kan vanneih zia te, a hlut ziate, tangkai tak leh dik taka hmang tur kan nihna te kan hriat a pawimawh em em a ni, a ti a. Vote nei thei rual an nih atanga Roll-a in register a, inthlannaa an duhzawng ngei hruaitu thlang thin tu, khua leh tui tha ni chho zel turin a fuih a ni.

Khuallian hian lawmman semna a nei nghal a, vawiina Serchhip District Contest a lawmman pakhatna dawngtute hi Chhiahtlang Higher Secondary School atanga zirlai rawn tel te an ni. An ni hian lawmman Certificate leh pawisa an dawn bakah Participation Prize pek an ni a. State Level inelna buatsaih hunah Serchhip District ai an awh zui nghal bawk ang. A tel zawng zawng ten participation prize, certificate leh pawisa fai an dawng theuh bawk.

He hun kaihruaitu Pu Abraham B. Khithei chuan, Election Commission of India in hetianga ruahmanna a neih chhan chu, thalai kum 14 leh kum 17 inkar, nakin lawka vote thlak thei khua leh tui la ni mai turte hnena Election pawimawhna thehdarh leh tuhngheh a tum vang a nih thu a sawia. Chutiang lama hmalakna atan chuan Interactive School Engagement programme duangin, Serchhip District ah pawh kumtir atang khan he programme hi kalpui tan a nih thu a sawi a ni.

Vawiina Quiz Contest neihna hi District Steering Committee Chairman Pu VL Remliana, MCS, PD Serchhip leh member dangten an buaipui a ni.